भीमफेदी गाडी दुर्घटना अपडेट : मृतक १० मध्ये चालकसहित २ जनाको पहिचान खुल्यो

सर्लाही हिँडेको माइक्रोबस सडकबाट करिब ७ सय मिटर तल खसेको थियो, ६ जना घाइते भएका छन् ।

मकवानपुरको भीमफेदीमा भएको माइक्रोबस दुर्घटनाका १० मृतकमध्ये २ जनाको पहिचान खुलेको छ । चालक सर्लाहीको कबिलासी नगरपालिका–८ का रविशंकर कुमार मण्डल र सर्लाहीको चक्रघट्टा गाउँपालिका–४, सुन्दरपुरटोलका सुवेक यादवको पहिचान खुलेको हो । अन्य ८ जना मृतकको पहिचान खुल्न बाँकी रहेको प्रहरीले जनाएको छ ।

मधेश प्रदेश ०३–००१ ज ०८८० नम्बरको गाडी मकवानपुरको भीमफेदी गाउँपालिका–६ चिसापानीगढी नजिक बिहीबार बिहान करिब ५:४५ बजे दुर्घटनामा परेको थियो । सडकबाट करिब ७ सय मिटर तल खस्दा १० जनाको मृत्यु भएको छ भने ६ जना घाइते भएका छन् ।

घटनास्थलमै ३ महिला, २ बालिका र ५ पुरुषको मृत्यु भएको हो । एक तीन वर्षीय बालकलाई भने दुर्घटनास्थलभन्दा केही माथि डाँडामा जीवितै उद्धार गरिएको प्रहरीले जनाएको छ ।

दुर्घटनामा मृत्यु हुनेहरू सबै सर्लाहीको चक्रघट्टा गाउँपालिका–४, सुन्दरपुरका रहेको गाउँपालिका अध्यक्ष कृष्णकुमार यादवले जानकारी दिए । उनीहरु ललितपुरको टीकाथलीबाट छठ मनाउन गाडी रिजर्भ गरेर गाउँ फर्कंदै गरेका थिए ।

प्रताप विष्ट कान्तिपुरको हेटौडा संवाददाता हुन् । उनी स्थानिय राजनीतिक र सामाजिक मुद्धाबारे रिपोर्टिङ/टिप्पणी लेख्छन् ।