विद्यालयले खेलेको देउसीभैलोबाट २६ लाख रुपैयाँभन्दा बढी संकलन

मकवानपुरको गाउँको एक माध्यमिक विद्यालय परिवारले देउसीभैलो खेलेर २६ लाख रुपैयाँभन्दा बढी रकम संकलन गर्न सफल भएको छ ।

हेटौंडा — मकवानपुरको गाउँको एक माध्यमिक विद्यालय परिवारले देउसीभैलो खेलेर २६ लाख रुपैयाँभन्दा बढी रकम संकलन गर्न सफल भएको छ ।

मकवानपुरगढी गाउँपालिका–३, मक्राञ्चुलीस्थित भानु माध्यमिक विद्यालयले स्वर्ण महोत्सव मनाउने उद्देश्यले गाउँमै तीन दिन देउसीभैलो खेलेको थियो । विद्यालयको स्वर्ण महोत्सव सफल बनाउन समुदायस्तरमा देउसीभैलो खेलिएको पूर्वविद्यार्थी माधव चौलागाईंले बताए ।

आइतबार, सोमबार र मंगलबार आयोजित देउसीभैलो कार्यक्रममार्फत २६ लाख ३१ हजार ५३० रुपैयाँ सहयोग जुटेको थियो । जसअनुसार भूमिचुली टोल विकास संस्थाबाट ५३ हजार ७६५ रुपैयाँ, सुशासन टोल विकास संस्थाबाट २ लाख ५ हजार रुपैयाँ, कालीदेवी मरङ्गे टोल विकास संस्थाबाट ८८ हजार २५४ रुपैयाँ र कालिदेवी टोल विकास संस्थाबाट ३ लाख ६१ हजार रुपैयाँ देउसीभैलोलाई सहयोग गरेका थिए ।

यसैगरी बाबियोडाँडा टोल विकास संस्थाबाट २ लाख ७१ हजार १२८ रुपैयाँ, देवीडाँडा टोल विकास संस्थाबाट १ लाख ८७ हजार ४८६ रुपैयाँ, मक्रानडाँडा धमिले टोल विकास संस्थाबाट १ लाख ३७ हजार २४७ रुपैयाँ, संगम टोल विकास संस्थाबाट ५ लाख ४२ हजार रुपैयाँ र विद्यालय परिसरमै आयोजित देउसीभैलोमा १ लाख ६८ हजार ५७७ रुपैयाँ सहयोग संकलन भएको विद्यालयले जनाएको छ ।

स्वर्ण महोत्सवका लागि ५ हजार रुपैयाँभन्दा बढी आर्थिक सहयोग गर्ने दाताहरूको नाम विद्यालयको स्वर्ण स्तम्भमा सम्मानपूर्वक अभिलेख गरिने व्यवस्था गरिएको छ । देउसीभैलो कार्यक्रममा विद्यालय व्यवस्थापन समिति पदाधिकारी, शिक्षक अभिभावक संघका पदाधिकारी, शिक्षक, कर्मचारी, विद्यार्थी र जनप्रतिनिधि सहभागी थिए ।

प्रताप विष्ट कान्तिपुरको हेटौडा संवाददाता हुन् । उनी स्थानिय राजनीतिक र सामाजिक मुद्धाबारे रिपोर्टिङ/टिप्पणी लेख्छन् ।