म्याग्दीको मालिका गाउँपालिका-५ मा न्यू देविस्थान युथ क्लबको आयोजनामा तिहार पर्वका अवसरमा गौडाखोलादेखि देउराली खोलासम्मको मोटरबाटो सरसफाइ तथा मर्मतसम्भार गरिएको छ।
क्लबका पदाधिकारी तथा सदस्य, आमा समूह र स्थानीय अग्रजहरूको सहभागितामा मङ्गलबार श्रमदान गरी मोटरबाटोमा जमेको माटो, ढुङ्गा तथा झाडी हटाउनाका साथै आवश्यक मर्मतसम्भार गरिएको हो।
बर्खा याममा अवरुद्ध सडक मर्मतमा ढिलाइ हुँदा स्थानीयवासीलाई आवतजावत र ढुवानीमा समस्या भएको थियो। सरकारी निकायको मुख ताकेर बस्दा ढिलाइ भएपछि युवाहरूले सडक मर्मतका लागि अगुवाइ गरेका हुन्।
अभियानमा ३० युवा सहभागी भएको क्लबका सचिव सुभास पुन मगरले बताए। उनका अनुसार तिहार मनाउन जन्मथलोमा भेला भएकाहरूले सामाजिक क्षेत्रमा योगदान पुर्याउने उद्देश्यले सडक मर्मत गर्न श्रमदान गरेका हुन्।
श्रमदान अभियानमा लक्ष्मीकुमार पुन, रेशम घर्ती मगर र रेकबहादुर पुनले ढुवानीका लागि ट्याक्टरको भाडा र खाजाका लागि आर्थिक सहयोग गरेको क्लबले जनाएको छ। खाजामा १० हजार ७९० रुपैयाँ खर्च भएको क्लबले जनाएको छ।
प्रकाशित: २६ कार्तिक २०८३ ०७:०५ बिहीबार
