यूईएफए च्याम्पियन्स लिगको दोस्रो चरणको खेलहरू आजदेखि सुरु हुँदैछ। पहिलो दिन नौ खेल हुँदैछन्।आर्सनल र लिल तथा गालातासारे र बार्सिलोनाबीचको प्रतिस्पर्धालाई आजको मुख्य खेलका रूपमा हेरिएको छ।
आज राति आर्सनलले घरेलु मैदानमा फ्रान्सेली क्लब लिलको सामना गर्नेछ। आर्सनल लगातार दोस्रो जित निकाल्ने लक्ष्यमा मैदान उत्रनेछ। लिल भने बलियो प्रतिद्वन्द्वीविरुद्ध उत्कृष्ट प्रदर्शन गर्दै अंक जोड्न चाहन्छ।
त्यस्तै, स्पेनिस क्लब बार्सिलोनाले टर्कीको गालातासारेसँग प्रतिस्पर्धा गर्नेछ। इस्तानबुलमा हुने खेलमा बार्सिलोना जित निकाल्दै आफ्नो अभियानलाई बलियो बनाउने लक्ष्यमा हुनेछ। घरेलु मैदानमा खेल्ने अवसर पाएको गालातासारे भने बार्सिलोनालाई रोक्दै सुखद नतिजा निकाल्न चाहन्छ।
आजकै अर्को आकर्षक खेलमा स्पेनको एट्लेटिको म्याड्रिड र इंग्लिस क्लब म्यानचेस्टर युनाइटेड भिड्नेछन्। दुवै टोलीका लागि यो खेल लिग चरणमा आफ्नो स्थिति बलियो बनाउने अवसर हुनेछ। एट्लेटिको घरेलु मैदानको फाइदा उठाउन चाहन्छ भने युनाइटेड अवे मैदानमा जित निकाल्ने लक्ष्यमा रहनेछ।
इटालीको इन्टर मिलानले बेल्जियमको क्लब ब्रुगसँग खेल्नेछ। जर्मनीको आरबी लाइपजिगले नेदरल्यान्ड्सको पीएसभी आइन्डहोभनको सामना गर्दा नर्वेको वाइकिङ र जर्मन क्लब बायर्न म्युनिखबीच पनि प्रतिस्पर्धा हुनेछ। स्पेनको भिल्लारियल र इटालीको नापोलीबीचको खेलले पनि समर्थकको ध्यान तान्ने अपेक्षा गरिएको छ।
मंगलबारका खेल नेपाली समयअनुसार राति १०:३० बजे लेन्स र स्पोर्टिङ सीपी तथा सबा र स्लाभिया प्रागबीचको प्रतिस्पर्धाबाट सुरु हुनेछन्। त्यसपछि बुधबार बिहान १२:४५ बजे आर्सनल-लिल, एट्लेटिको म्याड्रिड-म्यानचेस्टर युनाइटेड, इन्टर मिलान-क्लब ब्रुग, गालातासारे-बार्सिलोना, आरबी लाइपजिग-पीएसभी आइन्डहोभन, वाइकिङ-बायर्न म्युनिख र भिल्लारियल-नापोलीका खेल हुनेछन्।
च्याम्पियन्स लिगको लिग चरणमा ३६ टोली सहभागी छन्। नयाँ ढाँचाअनुसार प्रत्येक टोलीले आठ फरक प्रतिद्वन्द्वीसँग खेल्नेछन्। दोस्रो चरणका बाँकी खेल बुधबार हुनेछन्। त्यस दिन म्यानचेस्टर सिटी र पेरिस सेन्ट जर्मेन तथा रियल म्याड्रिड र रोमाबीचका खेल मुख्य आकर्षणका रूपमा रहनेछन्।
प्रकाशित: २७ आश्विन २०८३ १०:०९ मंगलबार
