रुकुम पूर्वको भूमे गाउँपालिका–९ की १५ वर्षीया सदीक्षा ओलीले चुनाव जितेर गएका पुष्पकमल दाहाललाई भत्किएको पुल बनाइदिन आग्रह गर्दै बनाएको भिडियो ४८ घण्टामै १३ लाखभन्दा बढी पटक हेरिएको छ ।
रुकुम पूर्व — 'हेलो ! प्रचण्ड बाजे, कता हुनुहुन्छ ? हाम्रो यहाँ पूर्व रुकुमबाट चुनाव जितेर मात्रै जानुभो, यहाँ पुलको हाल हेर्नुस् यस्तो छ । भाँच्चिएर हामी खोलाबाट तरेर जानुपर्छ । गाईबाछालाई बगाउन सक्छ, हामी मान्छेलाई पनि बगाउन सक्छ । बच्चाहरू यहाँबाट स्कुल आवतजावत समेत गर्छन् । तिनीहरूलाई पनि बगाउन सक्छ । त्यही भएर यहाँ पुल बनाइदिनुपर्यो ।'
आइतबार साँझ ८ बजेतिर यही भनेर एउटा भिडियो फेसबुकमा पोस्ट गरिन् रुकुम पूर्वकी सदीक्षा ओली ले । भूमे गाउँपालिका वडा नं. ९ चुनबाङको दोमै खोलामा भत्किएको पुल देखाउँदै बनाएको उक्त भिडियो ४८ घण्टामै १३ लाख पटकभन्दा धेरै हेरिएको छ ।
आफ्ना पशु–चौपायालाई चराउन यहाँ पुगेकी उनले सामान्य तरिकाले बनाएको यो भिडियोमा १ लाखभन्दा धेरैले रियाक्ट गरेका छन् भने हजारौंले कमेन्ट गरेका छन् ।
भूमे-९ की सदीक्षा १५ वर्षकी भइन् । गाउँदेखि एक घण्टा समय लाग्ने दुरीमा गैरीगाउँमा रहेको नेपाल राष्ट्रिय माध्यमिक विद्यालयमा कक्षा १० मा पढिरहेकी उनीले यसरी भिडियो बनाउन थालेको एक महिना मात्रै भयो । उनलाई यो काममा उनका दाइ सन्दीपले सहयोग गरिरहेका छन् । दाइसँग भएको फोन र ड्रोन क्यामेरामार्फत आफूले भिडियो बनाउने गरेको सदीक्षाको भनाइ छ ।
‘म बल्ल (गोरु) र बाख्रा ग्वाला आएको छु । बाख्राचाहिँ अघि नै घर पुगिसके, बल्लचाहिँ आएका छैनन् । हराए कि जस्तो लागिरहेको छ, ड्रोनबाट बल्ल खोज्न गैरहेकी छु,’ भनेर ड्रोनबाट गोरु देखाउँदै उनीहरूलाई घरतर्फ फर्काएको भिडियो एक महिनाअघि पहिलोपल्ट पोस्ट गरेकी थिइन् । उक्त भिडियो ४ लाख पटकभन्दा धेरै हेरिसकिएको छ ।
त्यस्तै, ड्रोनबाट घर वरिपरि रहेका च्याउ खोजिरहेको अर्को एउटा भिडियो पनि १० लाख पटकभन्दा धेरै हेरिने भिडियोमा परेको छ । उक्त भिडियो पनि उनले एक महिनाअघि नै पोस्ट गरेकी थिइन् ।
‘सुरुमा त मलाई फेसबुकबारे धेरै थाहा थिएन । दाइको फेसबुक हेरेर र उसले चलाएको देखेर मलाई पनि रहर लाग्यो अनि दाइकै सहयोगमा एक महिनाअघि फेसबुक खोलेँ । सुरुमा फोटोहरू हाल्न थालेँ अनि दाइकै सहयोगमा भिडियो बनाउन सुरु गरेको हुँ,’ उनले भनिन्, ‘रहरै रहरले सुरु गरेको हुँ । यसबाहेक केही त्यस्तो उद्देश्य छैन ।’ उसो त उनले ‘सदीक्षा भिजुल्स’ नाम राखेर फेसबुक चलाउन थालेकै एक महिना मात्रै भयो ।
आफ्नो फेसबुक मोनिटाइज नभएको तर हुने प्रक्रियामा रहेको उनको भनाइ छ । अहिलेसम्म उनले जम्माजम्मी २० वटा भिडियो र केही तस्बिरहरू राखेकी छिन् । एक महिनामै १३ हजार फलोअर्स पाएकी सदीक्षाका भिडियो हेरेर उनका स्कुले साथी र शिक्षक समेतले सकारात्मक प्रतिक्रिया जनाइरहेका छन् ।
गाउँको पुल भत्किएको बारे दुई दिनअघि राखेको भिडियोमा आफूहरूले दैनिक देखे-भोगेको दुःखलाई भिडियोमार्फत बताएको उनले सुनाइन् । ‘हामी दिनदिनै आवतजावत गर्ने घर नजिकको खोलामा रहेको यो पुल दुई महिना भयो भत्किएको । तर अहिलेसम्म कसैले पनि मर्मत गरेको छैन । अनि ग्वाला गएका बेला यसो विचार गरे यहाँबाट त प्रचण्डले चुनाव जितेका हुन् भन्ने लागेकाले धेरै सोच्दै–नसोची भिडियो बनाएको हुँ,’ उनले भनिन्, ‘चुनावका बेला उनी (प्रचण्ड) गैरीगाउँ आएका थिए त्यही बेला देखेकी पनि हुँ । अनि बाजे उमेरका भएकाले बाजे भनेरै पुलको माग गरेको हुँ ।’
यो पुल यस भेगका सर्वसाधारणले वडा कार्यालय, विद्यालय र जिल्ला सदरमुकामतर्फ जानका लागि प्रयोग गर्ने गरेको तर पुरानो भएर दुई महिनाअघि भत्किएपछि खोलामा अहिले बर्खे भेल बढ्दा जोखिम बढेको उनी बताउँछिन् ।
सदीक्षाको भिडियो–प्यासनबारे बताउँदै उनका दाइ सन्दीपले आफूले मोबाइल र ड्रोन चलाएको देखेर चासो गरेपछि उसको रहर पूरा गर्न चलाउन दिँदादिँदै बहिनीले सिकेको बताए । ‘म अलि पहिलोदेखि नै फोटो/भिडियो फेसबुकमा हाल्छु । रहरै–रहरमा ड्रोन पनि किने अनि नानीले आफूलाई पनि सिकाइदिन भनेपछि उसकै फेसबुक खोलिदिएर पोस्ट गर्न सिकाएको हुँ,’ उनी भन्छन्, ‘सुरुमा त मलाई नै सहयोग गर्थी, पछि भिडियो बनाउन र पोस्ट गर्न जानेपछि रमाउन थाली । अहिले ऊ आफैं काम गर्छे । उसको भिडियो हामीलाई पनि रमाइलो लाग्छ । उसको पढाइमा असर नपरोस् भनेर उनी धेरै मोबाइल चलाउन भने दिँदैनौँ ।’
सदीक्षाले केही भिडियो हिन्दी भाषामा समेत बनाएकी छिन् । एक वर्ष पहिला बुवा रोजगारीका लागि भारत गएर एक वर्ष बसेर फर्केकाले हिन्दीमा कुरा गर्ने गरेको र हिन्दी फिल्मसमेत हेर्ने गरेकाले रहर लागेर हिन्दीमा प्रयास गरेको बताइन् । ‘एउटा भिडियो यसै हिन्दीमा बोलेर बनाएकी थिएँ, राम्रो प्रतिक्रिया आएपछि अरु पनि केही भिडियोहरू बनाएँ । तर राम्रो र सजिलो त हाम्रो भाषामा बनाउन हो,’ उनी भन्छिन् ।
सदीक्षा बाबा, आमा र दाइसँगै गाउँमा बस्छिन् । उनलाई भिडियो बनाउने सिप धेरै सिक्ने रहर छ । उनी अहिले भिडियोमाभन्दा पनि पढाइमै केन्द्रित छिन् । तर दुई दिनअघि बनाएको ‘प्रचण्ड बाजे...’ वाला भिडियोको प्रतिक्रियाले भने आफू निकै हौसिएको उनले बताइन् । उनका अनुसार गाउँमा नेपाल टेलिकमको फोनको डेटा मुस्किलले चल्छ । वाईफाई भने घरसम्मै पुगेको छ तर इन्टरनेट साह्रै राम्रो नभए पनि काम भने जसोतसो चल्ने गरेको उनी बताउँछिन् ।
महेश केसी कान्तिपुरका रुकुम संवाददाता हुन् ।
