तेस्रो अधिवेशन नयाँ संसद् भवनबाटै सुरु होला ?

सात वर्षदेखि निर्माणाधीन सिंहदरबारस्थित संघीय संसद् भवनको सिभिल निर्माण लगभग सकिए पनि आन्तरिक काम बाँकी छ । मंसिर ११ गतेदेखि सुरु हुने भनिएको संसद् अधिवेशन नयाँ भवनबाट सञ्चालन गर्ने तयारी छ ।

काठमाडौँ — सरकारले मंसिर दोस्रो साता संसद् अधिवेशन आह्वान गर्ने तयारी गरेको छ । सभामुख डीपी अर्यालले मंसिर ११ गतेका लागि तयारी गर्न संसद् सचिवालयलाई निर्देशन पनि दिएका छन् । समयमै काम सकियो भने आसन्न अधिवेशन संसद्को नयाँ भवनबाट सुरु हुनेछ ।

सिंहदरबारमा सात वर्षदेखि निर्माणाधीन संघीय संसद् भवनको सातौँ पटक थपिएको म्याद आगामी फागुनमा सकिँदै छ । अब छिट्टै नयाँ भवन संघीय संसद् सचिवालयलाई हस्तान्तरण गर्ने पूर्वाधार विकास मन्त्रालयअन्तर्गतको विशेष भवन परियोजनाको तयारी छ । २०७६ असोजमा निर्माणको काम सुरु गरेर तीन वर्षभित्र भवन निर्माण गरेर हस्तान्तरण गर्ने भनिए पनि म्याद थप्दैमा सात वर्ष बितेको हो ।

६ अर्ब २९ करोड रुपैयाँमा निर्माण गर्ने ठेक्का पाएका दुई स्वदेशी र विदेशी कन्स्ट्रक्सनले सिभिलको काम लगभग सकेको र आन्तरिक काम बाँकी रहेको जनाएका छन् । आगामी संघीय संसद्को तेस्रो अधिवेशनमा प्रतिनिधिसभा बैठक नयाँ सभाकक्षबाट सञ्चालन गर्ने तयारी छ भने राष्ट्रिय सभाको बैठक चाहिँ अर्को अधिवेशनमा मात्र सुरु गर्ने गरी तयारी तीव्र पारिएको छ ।

संघीय संसद्को निर्माणाधीन भवनको अवस्थाबारे कान्तिपुर टेलिभिजनको रिपोर्ट ।

दशरथ राई कान्तिपुर टेलिभिजनका संवाददाता हुन् ।

पंकज श्रेष्ठ कान्तिपुर टेलिभिजनका संवाददाता हुन् ।