कार्यालय समयभन्दा पछाडि विशेषज्ञ चिकित्सकबाट सेवा लिन पाउने, आफूले चाहेको चिकित्सक छनोट गर्न सकिने तथा अत्याधुनिक उपकरणसहितको प्रयोगशाला सेवा उपलब्ध हुने भएपछि ईएचएसप्रति सेवाग्राहीको आकर्षण बढेको हो ।
दाङ — राप्ती स्वास्थ्य विज्ञान प्रतिष्ठान घोराहीमा अतिरिक्त स्वास्थ्य सेवा (ईएचएस) मार्फत विशेषज्ञ सेवा लिनेहरूको संख्या बढ्दो छ ।
कार्यालय समयभन्दा पछाडि विशेषज्ञ चिकित्सकबाट सेवा लिन पाउने, आफूले चाहेको चिकित्सक छनोट गर्न सकिने तथा अत्याधुनिक उपकरणसहितको प्रयोगशाला सेवा उपलब्ध हुने भएपछि ईएचएसप्रति सेवाग्राहीको आकर्षण बढेको हो ।
प्रतिष्ठानले बिहान ८ बजेदेखि अपराह्न ४ बजेसम्म नियमित ओपीडी सेवा सञ्चालन गर्दै आएको छ भने अपराह्न ४ बजेदेखि बेलुका ६ बजेसम्म ईएचएस सेवा प्रदान गर्दै आएको छ । ईएचएसको शल्यक्रिया सेवा बेलुका ८ बजेसम्म चल्ने गर्दछ ।
ईएचएसअन्तर्गत सेवाग्राहीले आफूलाई आवश्यक विशेषज्ञ चिकित्सक आफैं रोजेर अनलाइन टिकटमार्फत सेवा लिन सक्ने व्यवस्था गरिएको छ । प्रतिष्ठानको तथ्यांकअनुसार असोज १ गतेदेखि ३१ गतेसम्म ईएचएसअन्तर्गत विभिन्न विशेषज्ञ विभागबाट ४ सय ४१ जनाले सेवा लिएका छन् ।
विभागगत विवरणअनुसार सबैभन्दा बढी स्त्री तथा प्रसूति रोग विभागबाट १ सय ९० जनाले सेवा लिएका छन् । त्यस्तै, हाडजोर्नी विभागबाट ३४, बालरोगबाट ३३, दन्तरोगबाट २९, आँखारोगबाट २४, मेडिसिनबाट २३, नाक, कान तथा घाँटीबाट २० र मुटुरोग विभागबाट १८ जनाले सेवा लिएका छन् ।
यसैगरी, जनरल सर्जरीबाट १७, मनोरोगबाट १३, जनरल प्राक्टिस तथा इमर्जेन्सी मेडिसिनबाट १३, छालारोगबाट ११, न्युरो सर्जरीबाट ८ र युरोलोजी विभागबाट ८ जनाले सेवा लिएको अस्पतालका निर्देशक डा. सुरेश रसाइलीले जानकारी दिएका छन् ।
दुर्गालाल केसी कान्तिपुरका दाङ संवाददाता हुन् ।
-1794374973.png)
