सान्नीत्रिवेणी–६ मेहेलमुडीकी २७ वर्षीया बिरामी कैली सार्कीसहित आफन्तहरू सवार कर्णाली प्रदेश ०२–००१ च १२१५ नम्बरको बोलेरो जिप सोमबार बिहान दुर्घटनामा परेको थियो ।
कालीकोट — कालीकोटबाट बिरामी बोकेर सुर्खेत जाँदै गरेको बोलेरो जिप सोमबार बिहान ८ बजे दैलेखको गुराँस गाउँपालिका–१ काफलतोलीमा दुर्घटना हुँदा घाइते भएका ६ मध्ये चलाकसहित २ जनाको मृत्यु भएको छ । अन्य ४ जनाको सुर्खेतस्थित कर्णाली प्रदेश अस्पतालमा उपचार भइरहेको छ ।
सान्नीत्रिवेणी–६ मेहेलमुडीकी २७ वर्षीया बिरामी कैली सार्कीसहित आफन्तहरू सवार कर्णाली प्रदेश ०२–००१ च १२१५ नम्बरको बोलेरो दुर्घटनामा परेको थियो ।
दुर्घटनामा घाइतेमध्ये बोलेरो चालक सान्नीत्रिबेणी-७ मुम्रा ७ क्युरीका २१ वर्षीय चालक योगेश सिम्खाडा र बिरामीका आफन्त सान्नीत्रिवेणी–६ का ४१ वर्षीय रने सार्कीको मृत्यु भएको प्रहरी चौकी तल्लो डुंगेश्वरका प्रहरी सहायक निरीक्षक ललित रावलले बताए । उनीहरूको सुर्खेत अस्पताल नपुग्दै मृत्यु भएको मुम्राका स्थानीय वीरेन्द्र सिम्खाडाले बताए ।
प्रहरीका अनुसार विष सेवन गरेकी कैलीसहित जादुकला, गंग सार्की र तपेन्द्र सिम्खाडाको उपचार भइरहेको छ ।
तुलाराम पाण्डे कान्तिपुरका कालिकोट संवाददाता हुन् ।
