सन्धिखर्क नगरपालिकाले आयोजना गर्ने प्रतियोगितामा लुम्बिनी प्रदेशका १२ जिल्लाबाट करिब ३० टोली सहभागी हुने अपेक्षा गरिएको छ।
अर्घाखाँची — सदरमुकाम सन्धिखर्क टुडिखेल खेल मैदानमा लुम्बिनी प्रदेश स्तरीय भलिबल प्रतियाेगिता सञ्चालन हुने भएको छ ।
सन्धिखर्क नगरपालिकाले आयोजना गर्न लागेको साे प्रतियाेगितामा लुम्बिनी प्रदेशका १२ जिल्लाका खेलाडी टिमले भाग लिन पाउनेछन् । मंसिर १० देखि सुरू हुने प्रतियाेगितामा ३० टिम सहभागी हुने अपेक्षा आयाेजकले गरेको छ ।
सन्धिखर्क नगरपालिका प्रमुख प्रशासकीय अधिकृत प्रमाेद खनालले खेल प्रतियाेगितामा प्रथम हुने टोलीले एक लाख ५० हजार, द्वितीयले एक लाख र तृतीय हुने टोलीले ७५ हजार रुपैयाँ नगद पुरस्कार पाउने बताए । याे सबैभन्दा ठूलो पुरस्कार राशीकाे खेल भएको उनलेे बताए । टुडिखेलमा यसअघि अर्घाखाँची युवा परिषद्ले प्रथम पुरस्कार एक लाख रूपैयाँ राशिको राखेर खेल आयाेजना गरेको थियोे ।
नगरप्रमुख कृष्णप्रसाद श्रेष्ठले पहाडी जिल्लामा भलिबलको क्रेज भएकोले खेलकुदकाे प्रबर्द्धन, प्रतिभा खेलाडीको पहिचान र लुम्बिनी प्रदेशका भलिबल खेलाडीबीच प्रतिस्पर्धात्मक खेल संस्कृतिको विकास गर्ने उद्देश्यले प्रतियोगिता आयोजना गर्न लागिएको बताए । भलिबल प्रतियाेगिता हुँदा सदरमुकाम सन्धिखर्क आर्थिक गतिविधि बढ्ने अपेक्षा गरिएको छ ।
(65).jpg)
