नयाँ व्यवस्थाअनुसार कामदारले श्रीमान् वा श्रीमती, २५ वर्षभन्दा कम उमेरका छोरा तथा अविवाहित छोरीलाई साउदी अरेबिया ल्याउन सक्नेछन् ।
काठमाडौं — साउदी अरबले उच्च दक्षता भएका विदेशी कामदारलाई परिवारका आश्रित सदस्यलाई समेत ल्याउन पाउने नयाँ व्यवस्था लागू गरेको छ ।
साउदीको गृह मन्त्रालय ले मंगलबार सार्वजनिक गरेको जानकारीअनुसार यो व्यवस्था परराष्ट्र मन्त्रालय तथा मानव संसाधन तथा सामाजिक विकास मन्त्रालयसँगको समन्वयमा लागू गरिएको हो । यसले साउदीमा बसोबास गर्ने विदेशीको जीवनस्तर सुधार गर्न सहयोग पुग्ने सरकारको अपेक्षा छ ।
नयाँ व्यवस्थाअनुसार कामदारले श्रीमान् वा श्रीमती, २५ वर्षभन्दा कम उमेरका छोरा तथा अविवाहित छोरीलाई साउदी अरेबिया ल्याउन सक्नेछन् । गृह मन्त्रालयका अनुसार उच्च दक्ष विदेशी कामदारको रोजगार भिसा प्रक्रिया पूरा हुने क्रममा आवश्यक सबै सर्त पूरा भएमा उनका परिवारका सदस्यका लागि प्रवेश भिसा पनि एकैसाथ जारी गर्न सकिनेछ ।
परिवारका सदस्य साउदी अरेबिया पुगेपछि प्रचलित कानुन तथा नियमअनुसार उनीहरूको आवास अनुमति (इकामा)सम्बन्धी प्रक्रिया पूरा गर्न सकिने मन्त्रालयले जनाएको छ ।
साउदी सरकारले पछिल्ला वर्षहरूमा दक्ष विदेशी जनशक्ति आकर्षित गर्न नीतिमा सुधार गर्दै आएको छ । नयाँ व्यवस्थाले विशेषगरी उच्च सीप भएका विदेशी कामदारलाई साउदीमा बस्न र काम गर्न थप सहज बनाउने अपेक्षा गरिएको छ ।
होम दुई दशकदेखि पत्रकारिता गरिरहेका कार्कीले श्रम तथा आप्रवासन मामिलामा दख्खल राख्छन् । उनले खाडी क्षेत्र तथा मलेसियामा कार्यरत आप्रवासी श्रमिकमाथि रिपोटिङ गर्दै आएका छन् । उनकाे श्रम र आप्रवासनमा केन्द्रीत गैरआख्यान पुस्तक 'सनैया' प्रकाशित छ ।
