बाढी प्रभावित क्षेत्रमा बैंकहरूद्धारा २ अर्ब ४२ करोड बराबरको ऋण प्रवाह
काठमाडौँ — भोटेकोशी बाढी पीडित ऋणीले ऋणको साँवा ब्याज तिर्न आउँदो पुससम्म म्याद पाएका छन् । राष्ट्र बैंकले मंगलबार बैंक तथा वित्तीय संस्थालाई निर्देशन जारी गर्दै ऋणको साँवा ब्याज तिर्ने म्याद पुससम्म थप गर्न निर्देशन दिएको हो । यसअघि किस्ता तिर्ने अवधि असाेजसम्म रहेकाे थियाे ।
भोटेकोशी तथा बुढीगण्डकीको बाढीग्रस्त क्षेत्रमा प्रत्यक्ष असर परेका उद्यम, परियोजना वा व्यवसाय, रसुवा भन्सार नाकाबाट हुने कच्चा पदार्थ, अर्ध–तयारी तथा तयारी मालबस्तुको आयात वा निर्यातमा आधारित व्यवसाय एवं बाढीग्रस्त क्षेत्रमा प्रभावित ऋणीको हकमा बिक्री तथा आम्दानी, नगद प्रवाह, जगेडामा रहेको रकमलगायतका आधारमा साँवा ब्याज भुक्तानीको माग थप्न निर्देशन दिएको हो ।
निर्देशनमा ऋणीको वित्तीय अवस्था, आयात एवं निर्यातमा परेको असर र कर्जा सदुपयोगिताको यथार्थपरक विश्लेषण गरी किस्ता भुक्तानी गर्न कठिनाई भएका ऋणीको २०८३ असोज मसान्तमा किस्ता (साँवा र/वा ब्याज) भुक्तानी गर्ने समयावधि इजाजतपत्रप्राप्त संस्थाले २०८३ पुस मसान्तसम्म थप राष्ट्र बैंकले भनेको छ ।
भोटेकोशी बाढीले पुर्याएको क्षतिबारे सरकारले पनि अध्ययन गरिरहेको छ । अध्ययन सकिएपछि प्रतिवेदनको सुझाबका आधारमा पीडितका लागि थप सुविधा ल्याइने राष्ट्र बैंकका प्रवक्ता गुरुप्रसाद पौडेलले बताए । ‘यसअघि किस्ता तर्ने म्याद असोजसम्म मात्र थियो । अहिले त्यसलाई बढाएर पुससम्म बनाइएको हो । पीडितका लागि बाँकी सुविधा पनि आउँदै गर्छन,’ प्रवक्ता पौडेलले भने ।
बाढी प्रभावित क्षेत्रमा बैंकहरूले २ अर्ब ४२ करोड बराबरको ऋण प्रवाह गरेको नेपाल बैंकर्स संघले जनाएको छ ।
