भारतीय सुपरस्टार सलमान खान र नेपाली अभिनेता अनूप विक्रम शाही अभिनीत बहुप्रतीक्षित युद्धप्रधान फिल्म ‘मातृभूमिः मे वार रेस्ट इन पिस’ अन्ततः आगामी डिसेम्बर ४ मा सिनेमाघरमा प्रदर्शन हुने भएको छ। पटक–पटक प्रदर्शन मिति सर्दै आएको फिल्मको नयाँ मिति सलमानले शुक्रबार मुम्बईमा आयोजित प्रचारात्मक कार्यक्रममा घोषणा गरेका हुन्।
यसअघि ‘ब्याटल अफ गलवान’ नामबाट घोषणा गरिएको फिल्मको नाम यसै वर्ष परिवर्तन गरी ‘मातृभूमिः मे वार रेस्ट इन पिस’ राखिएको थियो। भारतीय तथा अन्तर्राष्ट्रिय सञ्चारमाध्यमका अनुसार, फिल्मको पटक–पटकको ढिलाइलाई लिएर विभिन्न अड्कलबाजी भइरहेका बेला सलमानले यसको प्रमुख कारण भिजुअल इफेक्ट्स (भीएफएक्स)लाई उत्कृष्ट बनाउने प्रयास र छायांकनका क्रममा आएको अवरोध भएको स्पष्ट पारेका छन्।
सलमानका अनुसार अहिले भीएफएक्सका विशेषज्ञहरूले फिल्मका हरेक दृश्यलाई अत्यन्त सूक्ष्म रूपमा परीक्षण गर्ने भएकाले निर्माण टोलीले गुणस्तरमा कुनै सम्झौता गर्न चाहेन।
उनले भने, ‘आजभोलि भीएफएक्सका धेरै विशेषज्ञ छन्, जसले फिल्मका हरेक दृश्यलाई ध्यानपूर्वक हेर्छन्। त्यसैले हामी फिल्मको कुनै दृश्यलाई जुम गरेर त्यसको भीएफएक्सको आलोचना गर्ने मौका कसैलाई दिन चाहँदैनौँ। हामी दृश्यले सबैलाई चकित पारून् भन्ने चाहन्छौँ।’
सलमानले फिल्मको छायांकन सुरुमा ४५ देखि ५० दिनभित्र सकिने अनुमान गरिएको भए पनि सहकलाकार चित्रांगदा सिंह घाइते भएपछि काम प्रभावित भएको बताए। उनी निको हुन समय लागेपछि निर्माण तालिका पछाडि धकेलिएको उनको भनाइ छ।
उनका अनुसार फिल्मलाई सुरुमा जनवरी वा जुनमा प्रदर्शन गर्ने योजना बनाइएको थियो। त्यसपछि प्रदर्शन मिति अगस्टसम्म सारियो र अन्ततः अब डिसेम्बर ४ मा विश्वभरका सिनेमाघरमा ल्याउने तयारी गरिएको छ।
फिल्मको नाम परिवर्तनसँगै यसको विषयवस्तुलाई लिएर पनि व्यापक चर्चा भएको छ। निर्देशक अपूर्व लाखियाको निर्देशनमा बनेको फिल्म सुरुमा गलवान उपत्यकामा भएको भारत–चीन सैनिक झडपलाई केन्द्रमा राखेर प्रचार गरिएको थियो। तर निर्देशकले पछि फिल्म केवल एउटा युद्ध वा सैनिक भिडन्तको कथा मात्र नभई मानवीयता, त्याग, सहानुभूति र सैनिकहरूले भोग्ने मौन संघर्षको कथा पनि रहेको बताएका छन्।
फिल्म सन् २०२० मा पूर्वी लद्दाखको गलवान क्षेत्रमा भारत र चीनका सैनिकबीच भएको तनावपूर्ण सैन्य भिडन्तबाट प्रेरित छ। गलवान उपत्यकाको झडपमा २० भारतीय सैनिकको मृत्यु भएको थियो, जसले दुई देशबीचको सम्बन्धमा गम्भीर तनाव सिर्जना गरेको थियो।
सलमान खानले फिल्ममा १६ बिहार रेजिमेन्टका कमान्डिङ अफिसर कर्नेल बिक्कुमल्ला सन्तोष बाबुको भूमिका निर्वाह गरेका छन्। उनी गलवान भिडन्तमा अन्य सैनिकसँगै मारिएका थिए र उनलाई मरणोपरान्त महा वीर चक्र प्रदान गरिएको थियो।
फिल्ममा सलमान र चित्रांगदा सिंहसँगै नेपाली अभिनेता अनूप विक्रम शाही पनि महत्त्वपूर्ण भूमिकामा देखिँदैछन्। कलाकारहरूको टोलीमा मुकेश ऋषि, अंकुर भाटिया, जेन शा र अभिलाष चौधरी पनि छन् भने अभिनेता विजय राजले फिल्ममा कथावाचकको आवाज दिएका छन्।
फिल्मको विषयवस्तुका कारण भारतबाहिर पनि यसले चर्चा र विवाद दुवै पाएको छ। पहिलो टिजर सार्वजनिक भएपछि चिनियाँ सञ्चारमाध्यम तथा केही चिनियाँ पक्षबाट फिल्मले गलवान घटनालाई अतिरञ्जित र तथ्यलाई विकृत रूपमा प्रस्तुत गर्न सक्ने आरोप लगाइएको थियो। भारतीय पक्षले भने फिल्मलाई कलात्मक अभिव्यक्तिको माध्यमका रूपमा व्याख्या गर्दै आएको छ।
यसैबीच, फिल्म सुरुमा जोडिएका ‘इन्डियाज मोस्ट फियरलेस’का लेखक शिव अरूर र राहुल सिंहले परियोजना गलवान घटनाको मूल विवरणभन्दा अगाडि बढिसकेको भन्दै फिल्मसँगको आफ्नो सम्बन्ध अन्त्य गरेको घोषणा गरेका छन्। यसले पनि ‘मातृभूमि’ अब केवल गलवान भिडन्तको प्रत्यक्ष पुनर्कथनभन्दा फराकिलो कथा बोकेको हुन सक्ने संकेत दिएको छ।
पटक–पटक प्रदर्शन मिति सर्नु, नाम परिवर्तन हुनु, भीएफएक्समा लामो काम हुनु र भारत–चीन तनावसँग जोडिएको संवेदनशील विषयवस्तुका कारण चर्चामा रहेको ‘मातृभूमिः मे वार रेस्ट इन पिस’ अब डिसेम्बर ४ मा दर्शकमाझ पुग्ने निश्चित भएको छ। नेपाली अभिनेता अनूप विक्रम शाहीको सहभागिताले भने नेपाली दर्शकमाझ पनि फिल्मप्रति विशेष चासो बढाएको छ।
प्रकाशित: २० कार्तिक २०८३ २०:२७ शुक्रबार
