भीमसेन थापा गाउँपालिका–१ मसेलका ३० वर्षीय महेश बानियाँको मृत्यु भएको प्रहरीले जनाएको छ।
गोरखा — जिल्लाको गोरखा नगरपालिका–८ माथिल्लो खोलखोले गैरीचौतारामा मोटरसाइकल दुर्घटना हुँदा एक जनाको मृत्यु भएको छ। भीमसेन थापा गाउँपालिका–१ मसेलका ३० वर्षीय महेश बानियाँको मृत्यु भएको प्रहरीले जनाएको छ।
बिहीबार राति आरुघाटबाट गोरखातर्फ आउँदै गरेको गण्डकी प्रदेश ०३–००१ प ०८१० नम्बरको मोटरसाइकल अनियन्त्रित भई सडकको नालामा पल्टिएको थियो। दुर्घटनामा बानियाँ गम्भीर घाइते भएका थिए।
टाउको र घाँटीमा चोट लागेर बोल्न नसक्ने अवस्थामा रहेका उनलाई उपचारका लागि प्रदेश अस्पताल गोरखा पठाइएको थियो। उपचारकै क्रममा उनको मृत्यु भएको जिल्ला प्रहरी कार्यालय गोरखाका डीएसपी राजकुमार श्रेष्ठले बताए।
हरिराम उप्रेती कान्तिपुरका गोरखा संवाददाता हुन् ।
