एक्सट्रिम इनर्जी कान्तिपुर म्याक्स स्पोर्ट समिट २०२६ का अवसरमा उनले एनपीएलमा सहभागी सबै विदेशी खेलाडीलाई धन्यवाद पनि दिएका छन् । उनले विदेशी खेलाडीको उपस्थितिले अन्तर्राष्ट्रिय स्तरमा नेपालको पर्यटन प्रवर्द्धनमा समेत सहयोग पुगेको बताए ।
काठमाडौं — खेलकुदमन्त्री सस्मित पोखरेलले नेपाल प्रिमियर लिग (एनपीएल)ले नेपाली क्रिकेटको मात्रै नभइ पर्यटन क्षेत्रको विश्वभर प्रवर्द्धनमा गरिरहेको बताएका छन् । एक्सट्रिम इनर्जी कान्तिपुर म्याक्स स्पोर्ट समिट २०२६ का अवसरमा उनले यस्तो बताएका हुन् ।
उनले जारी क्रिकेट लिगले पछिल्लो समय आम दर्शकले माग गरिरहेको अवसरलाई समेटेको बताएका छन् । उनले लामो समयदेखि खेललाई प्रतिस्पर्धाका रुपमा मात्रै हेर्दै आए पनि यस्ता प्रतियोगिताले खेल इकोसिस्टमलाई समेत सहयोग गरिरहेको हुने बताए । उनले भने, 'खेल क्षेत्र बलियो बन्न, व्यापार र लगानीका हिसाबले पनि यस्ता प्रतियोगिताको भूमिका महत्वपूर्ण हुने गर्छ । यस्ता कार्यक्रममले खेलसम्बन्धी हाम्रा धारणा परिवर्तन गर्न भूमिका मात्रै नखेल्ने नयाँ नयाँ अवधारणाको सुरुवात पनि गर्छ ।'
एनपीएलले यस्ता अवधारणलाई स्थापित गर्न सकिन्छ भन्ने विश्वास जगाएको उनले कार्यक्रममा बताए । पछिल्लो ३ वर्षदेखि आइपीएल नेपालमा मात्रै नभएर विश्वमै उदाहरणका रुपमा स्थापित भइरहेको उनको भनाइ छ । उनले भने, 'विश्व क्रिकेट समुदाय र समग्र खेल समुदाय नै नेपाली क्रिकेटको बारेमा चर्चा गरिरहेको पाएको छु । यसले नेपालमा क्रिकेटको ठूलो सम्भावन रहेको स्पष्ट पार्छ । अब यो क्रिकेटमा मात्रै सिमित हुन भएन । अन्य खेलहरूलाई पनि क्रिकेटमा जस्तै गरी हामीले साथ र सहयोग गर्न आवश्यक छ ।'
उनले एनपीएलमा सहभागी सबै विदेशी खेलाडीलाई धन्यवाद पनि दिएका छन् । उनले भने, 'तपाईहरूको उपस्थितिले अन्तर्राष्ट्रिय स्तरमा नेपालको पर्यटन प्रवर्द्धनमा धेरै सहयोग पुगेको छ ।'
