जिल्ला अस्पतालमा रगत नपाएपछि नाम्खा–३ की ३३ वर्षीया डिकी साङमु लामालाई शुक्रबार थप उपचारका लागि सुर्खेत ल्याइएको हो।
सुर्खेत — सुत्केरी बेथाले पाँच दिनदेखि थलिएकी हुम्लाकी एक महिलालाई नेपाली सेनाको हेलिकप्टरबाट उद्धार गरिएको छ।
जिल्ला अस्पताल हुम्लामा रगतको अभाव भएपछि नाम्खा गाउँपालिका–३ की ३३ वर्षीया डिकी साङमु लामालाई शुक्रबार बिहान उद्धार गरी थप उपचारका लागि प्रादेशिक अस्पताल सुर्खेत ल्याइएको हो।
आमा र शिशुको ज्यान जोखिममा परेपछि विभिन्न निकायसँग समन्वय गरेर हेलिकप्टरमार्फत उद्धार गरिएको जिल्ला अस्पताल हुम्लाकी अनमि सरिता बोहराले बताइन्। उनका अनुसार सुत्केरी बेथाले थलिएकी लामालाई रगत आवश्यक परे पनि जिल्ला अस्पतालमा उपलब्ध हुन सकेको थिएन।
महिला, बालबालिका तथा ज्येष्ठ नागरिक मन्त्रालयअन्तर्गतको राष्ट्रपति महिला उद्धार कार्यक्रम अन्तरगत उनलाई शुक्रबार उनको उद्धार गरिएको हो।
ज्योति कटुवाल कान्तिपुरकी सुर्खेत संवाददाता हुन् ।
