सुरुङमार्ग प्रयोगवापत ४ दिनमै ५१ लाख ८७ हजार संकलन भइरहेको नागढुंगा सुरुङमार्ग निर्माण आयोजनाले जनाएको छ ।
नागढुंगा (काठमाडौं) — नागढुंगा सुरुङमार्ग सञ्चालमा आएदेखि हालसम्म ५१ लाख ८७ हजार रुपैयाँ संकलन भएको छ । सुरुङमार्ग १५ कात्तिक आइतबारदेखि सञ्चालनमा आएको हो । नागढुंगा सुरुङमार्ग निर्माण आयोजनाका अनुसार सुरुङमार्ग सञ्चालनमा आएयता दैनिक ८ हजारको हाराहारीमा सवारी साधन सुरुङमार्गबाट आवजावत गरेका छन् ।
आयोजनाका उपआयोजना निर्देशक तथा सूचना अधिकारी सञ्जय पन्थीका अनुसार ५ दिनमा सवारीसाधनको चाप बढ्दै गएको छ । पन्थीले भने, ‘पहिलो दिन आइतबार करिब ७ हजार ५०० सवारीसाधनले सुरुङमार्ग प्रयोग गरेका थिए । त्यसयता दैनिक सवारीसाधनको संख्या बढेर ८ हजारको हाराहारीमा पुगेको छ ।’ उनका अनुसार सुरुङमार्ग सञ्चालमा आएको पहिलो दिन करिब ११ लाख ७० हजार, दोस्रो दिन १२ लाख ७१ हजार, तेस्रो दिन १३ लाख १५ हजार, चौथो दिन १४ लाख ३१ हजार रुपैयाँ संकलन भएको छ ।
उनले भने, ‘दोस्रो दिन १२ लाख ७१ हजार, तेस्रो दिन १३ लाख १५ हजार, चौथो दिन १४ लाख ३१ हजार रकम संकलन भएको छ । आजको पाँचै दिनको राति १२ बजे मात्रै विवरण आउँछ ।’
पाँचौँ दिनको पूर्ण विवरण भने संकलन प्रक्रिया पूरा भएपछि मात्रै प्राप्त हुने उनले बताए । उनका अनुसार पाँचौँ दिनको विवरण राति १२ बजेपछि मात्रै अद्यावधिक हुने भएकाले तत्काल यकिन तथ्यांक उपलब्ध हुन सकेको छैन ।
टोल दस्तुर संकलन सुरु भएपछि केही सवारीचालकबाट भने समस्या देखिएको आयोजनाले जनाएको छ । विशेषगरी भारतीय नम्बर प्लेटका केही सवारीसाधनले तत्काल शुल्क तिर्न रकम नभएको बताउने र पछि शुल्क तिर्ने गरी अन्यत्र जान खोज्दा केही समय अवरोध हुने गरेको पन्थीले बताए ।
त्यस्ता घटनाका कारण कहिलेकाहीँ सवारीसाधनको लाम लाग्ने र जाम हुने समस्या देखिएको उनको भनाइ छ ।
नेपाल नेपाल न्यूज बैंक न्युज एजेन्सी हो ।
.jpg)
