खोटेहाङ–६ की २२ वर्षीया लक्ष्मी थापालाई सुत्केरी व्यथा लागेपछि राष्ट्रपति महिला उत्थान कार्यक्रमअन्तर्गत बुधबार काठमाडौं लगिएको थियो।
खोटाङ — सुत्केरी व्यथा लागेको एक गर्भवती महिलाको उद्धार गरिएको छ । खोटेहाङ गाउँपालिका–६ इन्द्रेणीपोखरीका मिनबहादुर खत्रीकी श्रीमती २२ वर्षीया लक्ष्मी थापाको बुधबार नेपाली सेनाको हेलिकोप्टरमार्फत उद्धार गरिएको हो ।
राष्ट्रपति महिला उत्थान कार्यक्रमअन्तर्गत थापाको उद्धार गरिएको इन्द्रेणीपोखरीका वडाध्यक्ष वसन्त राईले बताए । उनले थापाथलीस्थित परोपकार प्रसूतिगृहमा शल्यक्रियामार्फत जुम्ल्याहा शिशुलाई जन्म दिएकी छन् । सुत्केरी व्यथा लागेपछि मंगलबार राति इन्द्रेणीपोखरी आधारभूत अस्पतालमा भर्ना गरिएको थियो ।
बच्चाको तौल सामान्य अवस्थाको भन्दा कम भएकाले रेफर गरिएको राईले बताए । शल्यक्रिया गरेर निकालिएका बच्चाको तौल कम भएकाले भेन्टिलेटरमा राखिएको छ । आमाको अवस्था भने सामान्य रहेको राईको भनाइ छ ।
डम्बरसिं राई कान्तिपुरका खोटाङ संवाददाता हुन् ।
