अभिषेकले अस्ट्रेलियन ओपन २०२७ मा पुग्नका लागि उनले छनोट खेल्ने अवसर पाएका छन् । उनले एसिया/प्यासिफिक वाइल्ड कार्ड प्लेअफमा प्रतिस्पर्धा गर्ने मौका पाएका छन् ।
काठमाडौँ — नेपाली व्यावसायिक टेनिस खेलाडी अभिषेक बास्तोलाले आफ्नो सपना पूरा गर्ने क्षणमा पुगेका छन् । सानैदेखि ग्रान्ड स्लाम टेनिस खेल्ने सपना पूरा गर्न उनी एक खुट्किलो टाढा छन् ।
अभिषेकले अस्ट्रेलियन ओपन २०२७ मा पुग्नका लागि उनले छनोट खेल्ने अवसर पाएका छन् । उनले एसिया/प्यासिफिक वाइल्ड कार्ड प्लेअफमा प्रतिस्पर्धा गर्ने मौका पाएका छन् ।
चीनको छेन्दुमा २३ देखि २८ नोभेम्बरसम्म हुने छनोटमा अभिषेकले नेपालको प्रतिनिधित्व गर्नेछन् । बुधबार पत्रकार सम्मेलन गर्दै अभिषेकले अस्ट्रेलियन ओपन खेल्ने आफ्नो बच्चैदेखिको सपना पूरा हुन लागेको सुनाए । ‘अस्ट्रेलियन ओपन खेल्ने सपना थियो । त्यहाँ पुग्नका लागि छनोट खेल्ने अवसर पाउँदा निकै खुसी छु । उत्कृष्ट प्रदर्शन गरेर त्यहाँ पुग्न प्रयास गर्नेछु,’ उनले भने ।
एसिया/प्यासिफिक क्षेत्रका खेलाडीलाई अस्ट्रेलियन ओपनको मुख्य प्रतियोगितासम्म पुग्नेका लागि प्लेअफ हुन लागेको हो ।
विश्वकै चार ग्रान्ड स्लाममध्ये एक अस्ट्रेलियन ओपन एसिया/प्यासिफिक क्षेत्रको प्रतिष्ठित टेनिस प्रतियोगिता हो । प्लेअफमा अस्ट्रेलियाबाहेक एसिया/प्यासिफिक क्षेत्रका देशका खेलाडीले भाग लिनेछन् । पुरुष र महिला दुवैतर्फ विश्व वरीयतामा १०५ वा सोभन्दा पछाडि रहेका खेलाडीका लागि प्रतियोगिता खुला गरिएको छ ।
अभिषेकले एकल विधामा प्रतिस्पर्धा गर्नेछन् । उनले छनोट चरणका लागि उपलब्ध चार वाइल्ड कार्डमध्ये एक प्राप्त पाएका हुन् । छनोट चरणमा आठ खेलाडीबीच प्रतिस्पर्धा हुनेछ । त्यसबाट शीर्ष चार खेलाडी मुख्य ड्रमा प्रवेश गर्नेछन् । मुख्य ‘ड्र’ मा यसअघि नै वरीयताका आधारमा छनोट भएका १२ खेलाडीले प्रतिस्पर्धा गर्नेछन् । उनी नेपालबाट चार पटक एसियाली खेलकुद खेल्ने एक्लो टेनिस खेलाडी हुन् ।
अभिषेकले अन्तर्राष्ट्रिय प्रतियोगितामा नेपालको प्रतिनिधित्व गर्दै आए पनि राज्य र सम्बन्धित खेल संघबाट उचित सहयोग नपाएको गुनासोसमेत गरे । जति पनि सहभागिता जनाउँदै आएका छन्, त्यसमा व्यक्तिगत पहलमा भइरहेको उनले सुनाए ।
