पर्साका ग्रामीण तथा बजार क्षेत्रमा अवैध रूपमा चलाइएका सवारीसाधन खोज्ने क्रममा प्रहरीले दुवै गाडी फेला पारेको हो।
पर्सा — अवैध रूपमा भन्सार छली नेपाल भित्र्याइएका दुईवटा चारपाङ्ग्रे सवारीसाधन प्रहरीले वीरगन्जबाट बरामद गरेको छ ।
जिल्ला प्रहरी कार्यालय पर्साका अनुसार लामो समयदेखि भन्सार प्रक्रिया पूरा नगरी नेपाल भित्र्याइएका सवारीसाधन पर्साको ग्रामीण तथा बजार क्षेत्रमा अनधिकृत रूपमा सञ्चालन भइरहेको विशेष सूचनाका आधारमा प्रहरीले खोजी अभियान चलाएको थियो ।
सोही क्रममा मंगलबार दिउँसो करिब अढाइ बजे वीरगन्ज महानगरपालिका–१६ इनर्वागाउँस्थित सडकखण्डमा बेवारिसे अवस्थामा राखिएका भारतीय नम्बर प्लेटका बोलेरो गाडी र मारुती सुजुकी कार फेला परेका थिए ।
प्रहरीले ती सवारीसाधनमाथि हकदाबी गर्न सम्बन्धित व्यक्तिको खोजतलास गरे पनि कोही सम्पर्कमा नआएपछि दुवै सवारीसाधन नियन्त्रणमा लिएको जनाएको छ ।
बरामद दुवै सवारीसाधनको अनुमानित मूल्य २२ लाख रुपैयाँ कायम गरिएको छ । थप अनुसन्धान तथा आवश्यक कारबाहीका लागि प्रहरीले दुवै सवारीसाधन वीरगन्ज भन्सार कार्यालयमा बुझाएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लले जानकारी दिए ।
शंकर आचार्य कान्तिपुरका पर्सा संवाददाता हुन् ।
