भेटमा नेपाल–भारत सम्बन्ध र दुई देशबीचको बहुआयामिक साझेदारीलाई थप सुदृढ बनाउने विषयमा छलफल भएको परराष्ट्र मन्त्रालयले जनाएको छ ।
काठमाडौँ — भारतीय विदेश सचिव विक्रम मिस्रीले बुधबार परराष्ट्रमन्त्री शिशिर खनालसँग भेटवार्ता गरेका छन् । दुईदिने नेपाल भ्रमणका क्रममा काठमाडौं आएका मिस्रीले परराष्ट्र मन्त्रालयमा पुगेर मन्त्री खनालसँग शिष्टाचार भेट गरेका हुन् ।
भेटमा नेपाल–भारत सम्बन्ध र दुई देशबीचको बहुआयामिक साझेदारीलाई थप सुदृढ बनाउने विषयमा छलफल भएको परराष्ट्र मन्त्रालयले जनाएको छ । मन्त्रालयका अनुसार दुई देशबीच लामो समयदेखि कायम मित्रवत् सम्बन्धलाई थप प्रगाढ बनाउने विषयमा पनि कुराकानी भएको थियो ।
आफ्ना नेपाली समकक्षी अमृतबहादुर राईको निमन्त्रणामा बुधबार बिहान काठमाडौं आइपुगेका मिस्रीले बिहीबार राईसँग प्रतिनिधिमण्डलस्तरीय वार्ता गर्ने कार्यक्रम छ । वार्तामा नेपाल–भारत सम्बन्धका समग्र पक्षको समीक्षा हुनुका साथै आपसी हितका क्षेत्रीय तथा अन्तर्राष्ट्रिय विषयमा विचार आदानप्रदान हुनेछ ।
मिस्रीको भ्रमणलाई प्रधानमन्त्री बालेन्द्र शाहको यसै महिनाको अन्त्यतिर हुन सक्ने भारत भ्रमणको तयारीका दृष्टिले पनि महत्त्वपूर्ण मानिएको छ । भ्रमणका क्रममा दुई देशबीचको सहकार्य विस्तारका विषयसँगै प्रधानमन्त्रीको भारत भ्रमणको तयारीबारे पनि छलफल हुने अपेक्षा गरिएको छ ।
अनिल गिरी काठमाडौं पाेस्टका संवाददाता हुन् । उनी परराष्ट्र मामिलामा रिपोर्टिङ/टिप्पणी लेख्छन् ।
