बन्गाड कुपिण्डे–७ स्थित सिम्तीगैरा सामुदायिक वनमा सूचनाका आधारमा गरिएको खोजीमा पाँच थान बन्दुक भेटिएका हुन्।
सल्यान — सल्यानमा सामुदायिक वनमा लुकाएर राखेका पाँच थान भरुवा बन्दुक प्रहरीले बरामद गरेको छ । बन्गाड कुपिण्डे नगरपालिका-७ लेकसंग्रही स्थित सिम्तीगैरा सामुदायिक वनमा बेवारिसे अवस्थामा रहेको भरुवा बन्दुक बरामद गरेको हो ।
जिल्ला प्रहरी कार्यालय सल्यानका सूचना अधिकारी प्रहरी निरीक्षक ईश्वरी रोकायका अनुसार सूचनाको आधारमा सिम्ती गैरा सामुदायिक वनमा पाँच थान भरुवा बन्दुक बरामद गरेको हो ।
नियन्त्रणमा लिएको भरुवा बन्दुक इप्रका देवस्थलमा राखिएको उनले जानकारी गराए । जंगली जनावर चोरीसिकार गर्नेले भरुवा बन्दुक जंगलमा लुकाई राखेको हुनसक्ने उनको भनाइ छ । विगतमा पनि पटक पटक गरी सामुदायिक वनमा लुकाई राखेको भरुवा बन्दुक बरामद हुँदै आएको उनले बताए ।
विप्लव महर्जन कान्तिपुरका सल्यान संवाददाता हुन् ।
