नयाँ सेवाले श्वासप्रश्वास, सघन उपचार र निद्रासम्बन्धी समस्या भएका बिरामीलाई निजी अस्पतालको महँगो उपचारमा निर्भर हुनुपर्ने बाध्यता घटाउनेछ।
नेपालगन्ज — पश्चिम नेपालका बिरामीलाई सेवा दिँदै आएको बाँकेको नेपालगन्जस्थित भेरी अस्पतालमा फोक्सो तथा श्वासप्रश्वास रोग, सघन उपचार (क्रिटिकल केयर) र निद्रा रोगसम्बन्धी विशेषज्ञ सेवा सुरु भएको छ ।
अस्पतालले पहिलो पटक मंगलबारदेखि यी तीन विधाका विशेषज्ञ सेवा सञ्चालनमा ल्याएको हो । यससँगै फोक्सो तथा श्वासप्रश्वाससम्बन्धी समस्या, जटिल अवस्थाका बिरामीको सघन उपचार तथा निद्रासम्बन्धी समस्याको पहिचान, परीक्षण र उपचारका लागि बिरामीले अस्पतालमै विशेषज्ञ सेवा पाउने भएका छन् ।
नयाँ सेवाको अस्पताल विकास समितिका अध्यक्ष डा. लक्ष्मण सिग्देल, प्रमुख मेडिकल सुपरिन्टेन्डेन्ट डा. नवीन दर्नाल, प्रमुख कन्सल्टेन्ट डर्माटोलोजिस्ट डा. बद्री चापागाईं, प्रमुख कन्सल्टेन्ट फिजिसियन डा. राजन पाण्डे र नर्सिङ प्रमुख पद्मादेवी देवकोटालगायतले संयुक्त रूपमा उद्घाटन गरे ।
प्रमुख मेडिकल सुपरिन्टेन्डेन्ट डा. दर्नालले नयाँ सेवा सुरु भएसँगै फोक्सो तथा श्वासप्रश्वाससम्बन्धी समस्या भएका र सघन उपचार आवश्यक पर्ने बिरामीलाई सहज हुने बताए । अब यस्ता बिरामीले महँगो शुल्क तिरेर निजी अस्पतालमा उपचार गराउनुपर्ने बाध्यता कम हुने उनको भनाइ छ ।
अस्पताल विकास समितिका अध्यक्ष डा. सिग्देलले विशेषज्ञ स्वास्थ्य सेवाको दायरा विस्तार गर्दै सर्वसाधारणलाई सहज, सुलभ र गुणस्तरीय सेवा उपलब्ध गराउने प्रयासलाई अस्पतालले निरन्तरता दिँदै आएको बताए । अस्पतालका अनुसार नयाँ विशेषज्ञ सेवा ओपीडी कक्ष नम्बर ७ (ए) बाट हरेक साताको मंगलबार र बिहीबार उपलब्ध हुनेछ ।
रुपा गहतराज कान्तिपुरकी बाँके संवाददाता हुन् ।
.jpg)
