जाजरकोटको छेडागाड नगरपालिका-१ र शिवालय गाउँपालिका-९ जोड्ने झोलुङ्गे पुल उद्घाटन गरिएको छ । मंगलबार एक कार्यक्रमकाबीच प्रतिनिधि सभा सदस्य खडकबहादुर बुढाले साझेखेतस्थित उक्त पुलको उद्घाटन गरेका हुन् ।
जाजरकोटको छेडागाड नगरपालिका-१ र शिवालय गाउँपालिका-९ जोड्ने झोलुङ्गे पुल उद्घाटन गरिएको छ । मंगलबार एक कार्यक्रमकाबीच प्रतिनिधि सभा सदस्य खडकबहादुर बुढाले साझेखेतस्थित उक्त पुलको उद्घाटन गरेका हुन् ।
८३ मिटर लामो उक्त पुल पूर्वाधार विकास कार्यालय जाजरकोटमार्फत निर्माण गरिएको हो । पुल निर्माणका लागि ५४ लाख ८१ हजार ८ सय २४ रुपैयाँ लागत अनुमान गरिएकोमा निर्माण सम्पन्न हुँदा ५२ लाख १ सय ४७ रुपैयाँ खर्च भएको जनाइएको छ ।
पुल उद्घाटन गर्दै सांसद बुढाले पुल निर्माण भएपछि छेडागाड नगरपालिका-१ र शिवालय गाउँपालिका-९ का स्थानीयवासीलाई आवतजावतमा सहज हुने बताए । विशेषगरी विद्यार्थी तथा सर्वसाधारण नागरिकलाई खोला वारपार गर्न सहज हुने उनको भनाइ छ ।
यसअघि पुल नहुँदा स्थानीयवासीले खोला वारपार गर्न निकै सास्ती भोग्दै आएका थिए । विशेषगरी वर्षायाममा खोला तर्न जोखिम मोल्नुपर्ने बाध्यता रहेको थियो ।
यस्तै, पूर्वाधार विकास कार्यालय जाजरकोटका प्रमुख नवीन आचार्यले पुल निर्माण हुनु मात्रै ठूलो कुरा नभई यसको दिगोपनाका लागि नियमित मर्मतसम्भारमा समेत ध्यान दिनुपर्ने बताए । पुलको संरक्षण र मर्मतसम्भारमा सम्बन्धित पक्षले जिम्मेवारी लिनुपर्ने उनको भनाइ छ ।
पुल निर्माणसँगै दुई स्थानीय तहका बासिन्दाको आवागमन सहज हुनुका साथै विद्यार्थी, सर्वसाधारण तथा स्थानीयको दैनिक जनजीवनमा समेत राहत पुग्ने विश्वास उनको छ ।
