काठमाण्डौ । पूर्वअर्थमन्त्री शंकर कोइरालाले सरकारले अब उद्योग, ऊर्जा र पूर्वाधार विकासमा निजी क्षेत्रलाई अझ खुला र सहज वातावरण दिनुपर्ने बताएका छन्।
पूर्वअर्थमन्त्रीहरूसँगको छलफलमा कोइरालाले विगतमा तयार भएका आर्थिक सुधारसम्बन्धी प्रतिवेदनहरूलाई ‘सजावटका दस्तावेज’ मात्रै नबनाई कार्यान्वयनमा लैजानुपर्ने धारणा राखे।
उनले अर्थमन्त्री वाग्लेलाई “सही समयमा सही ठाउँमा आएको व्यक्ति” भन्दै सफलताको शुभकामना दिँदै अहिले सुधार गर्ने अनुकूल राजनीतिक परिस्थिति बनेको बताए।
कोइरालाले ऊर्जा क्षेत्रमा निजी क्षेत्रको भूमिका विस्तार गर्नुपर्नेमा जोड दिँदै विद्युत व्यापार निजी क्षेत्रलाई खुला गर्नुपर्ने प्रस्ताव गरे। अहिले उत्पादनमा निजी क्षेत्रको सहभागिता भए पनि व्यापारमा सरकारी नियन्त्रण धेरै रहेको उनको बुझाइ थियो।
ठूला आयोजना निर्माणका क्रममा वनसम्बन्धी कानुनी जटिलता ठूलो अवरोध बनेको भन्दै उनले वन क्षेत्रसम्बन्धी अप्ठ्याराहरू फुकुवा गर्न सुझाव दिए। त्यस्तै, नयाँ उद्योग र औद्योगिक क्षेत्र स्थापना गरी रोजगारी सिर्जना गर्नुपर्ने धारणा पनि राखे।
उनले विदेशी लगानीकर्तालाई विनिमय जोखिमबाट जोगाउन ‘हेजिङ पोलिसी’ प्रभावकारी रूपमा कार्यान्वयन गर्नुपर्नेमा जोड दिए। यो नीति जनार्दन शर्माको कार्यकालमा अघि बढाइएको स्मरण गर्दै त्यसलाई निरन्तरता दिन आग्रह गरे।
कोइरालाले पुराना सरकारी उद्योग पुनर्जीवित गर्ने बहसभन्दा नयाँ उद्योग स्थापना र उत्पादन विस्तारमा केन्द्रित हुनुपर्ने बताए। यद्यपि उनले “सरकारले कपडा उद्योग चलाउनुपर्छ” भन्ने धारणा राख्दै केही रणनीतिक उद्योगमा राज्यको भूमिका आवश्यक हुने उल्लेख गरे।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।
