काठमाण्डौ । सिटिजन्स बैंक इन्टरनेसनल लिमिटेडले आफ्ना ग्राहकलाई विभिन्न सेवा तथा सुविधामा छुट उपलब्ध गराउने अभियानअन्तर्गत द चौतारी हस्पिटालिटी ग्रुप प्राइभेट लिमिटेडसँग सम्झौता गरेको छ।
बैंक र काठमाण्डौको दरबारमार्गस्थित द चौतारी हस्पिटालिटी ग्रुपबीच बैंकका ग्राहकलाई विशेष छुट प्रदान गर्ने समझदारीपत्रमा हस्ताक्षर भएको हो।
सम्झौताअनुसार सिटिजन्स बैंकका कार्डवाहक तथा मोबाइल बैंकिङ प्रयोगकर्ता ग्राहकले द चौतारी हस्पिटालिटी ग्रुपद्वारा सञ्चालित दरबारमार्गस्थित रेस्टुरेन्टको खाना तथा पेय पदार्थ (Drinks and Beverages) मा ७ प्रतिशत छुट पाउनेछन्।
बैंकले डिजिटल बैंकिङ सेवाको प्रयोग बढाउने र ग्राहकलाई दैनिक उपभोग्य सेवा तथा सुविधामा थप लाभ उपलब्ध गराउने उद्देश्यले उक्त सम्झौता गरेको जनाएको छ।
यस प्रकारका सहकार्यबाट ग्राहकलाई डिजिटल माध्यमबाट भुक्तानी गर्न प्रोत्साहन मिल्ने र नगदरहित कारोबार विस्तारमा समेत सहयोग पुग्ने बैंकको विश्वास छ।
सम्झौतासम्बन्धी थप जानकारी बैंकको आधिकारिक वेबसाइटबाट प्राप्त गर्न सकिने जनाइएको छ।
सिटिजन्स बैंकले डिजिटल बैंकिङ सेवाको विस्तारसँगै ग्राहकलाई लक्षित विभिन्न योजना सञ्चालन गर्दै आएको छ।
बैंकले नेपालमै पहिलोपटक ‘सिटिजन्स फोनपे क्रेडिट कार्ड’ भर्चुअल क्रेडिट कार्ड सञ्चालनमा ल्याएको जनाएको छ। त्यसैगरी नवयुवालक्षित बचत खाता ‘सिटिजन्स जेन–जी सेभिङ अकाउन्ट’ र महिलालक्षित डिजिटल बैंकिङ सेवा ‘नारी फिनटेक अकाउन्ट’ समेत सञ्चालनमा ल्याएको छ।
फ्रिलान्सरलाई लक्षित गरी ‘फ्रिलान्सर सेभिङ अकाउन्ट’ नामक नयाँ बचत खाता पनि सुरु गरिएको बैंकले जनाएको छ।
त्यस्तै, मोबाइल बैंकिङ एपमार्फत सेयर आवेदन र सीआरएन नम्बर सेवा लिन सकिने व्यवस्था मिलाइएको छ। ग्राहकले बैंकको शाखामा नगई मोबाइल बैंकिङमार्फत नै सेवा उपयोग गर्न सक्नेछन्।
बैंकका अनुसार हाल ६१ जिल्लामा फैलिएका २०० शाखा, १७७ एटीएम, तीन विस्तारित काउन्टर र ४२ शाखारहित बैंकिङ इकाइमार्फत २० लाख ८४ हजारभन्दा बढी ग्राहकलाई बैंकिङ सेवा प्रदान गरिँदै आएको छ।
सिटिजन्स बैंकले आगामी दिनमा पनि विभिन्न व्यावसायिक प्रतिष्ठानसँग सहकार्य विस्तार गर्दै ग्राहकलाई थप सुविधा उपलब्ध गराउने र डिजिटल कारोबारलाई प्रोत्साहन गर्ने रणनीति अघि बढाएको छ।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।
