आज यो वर्षको विजयादशमीको मुख्य दिन दशैँ । आफ्ना मान्यजनबाट टिका जमरा लगाई आशिर्वाद थाप्ने दिन । आशिर्वादसँगै दशैँमा दक्षिणा पनि प्राप्त हुन्छ । दशैँ तिहारको समयमा प्राप्त हुने दक्षिणाबाट हाम्रा बालबालिकाले फजुल खर्च गरिरहेका हुन्छ । बच्चाका अभिभावकहरुले पनि यो विषयमा खासै चासो दिएको देखिदैन् ।
मामा, माइजु, काका काकी बाट पाएको दक्षिणालाई फजुल रुपमा खर्च गर्ने भन्दा पनि त्यसलाई कुनै क्षेत्रमा लगानी गर्ने बानि बसालियो भने त्यसले भविष्यमा ठूलो सहयोग पुग्न सक्छ । अहिलेको तपाइको सानो लगानी पछि तपाइका लागि ठूलो साहारा बन्न सक्छ । कुनै पनि कामको सुरुवात ढीलो र लगानी सानो नहुन सक्छ । तपाइले अघिल्ला वर्षहरुमा पाएको दक्षिणालाई फजुल रुपमा खर्च गरे पनि यो वर्ष देखि त्यो बानिलाई बदल्नु भयो भने तपाइको जीवनमा ठूलो परिवर्तन हुन सक्छ ।
पाएको दक्षिणाबाट फाइदा दिनका लागि के गर्ने भनेर साना बालबालिकाले सोच्न सक्दैन् । त्यसका लागि बाबु आमाले बच्चाको बानिलाई परिवर्तन गराउनु आवश्यक छ । यदि तपाइको बच्चाले पाएको दक्षिणा उसले साथीभाइहरुसँग खर्च गरेर अझ भनौ पिकनिक गएर सक्यो भने एक छिनका लागि रमाइलो मात्रै हो । तर, यदि बचत वा लगानी गरियो भने त्यो भविष्यको साहारा हुने निश्चित छ । तपाइलाई लाग्ला दशैँमा पाइन केही हजारको दक्षिणा कहाँ लगानी गर्ने होला ? तपाइले बैंक खाता खोलेर बचत गर्न सक्नुहुन्छ । पाएको दक्षिणामा अभिभावले केही रकम थपेर जीवन बीमा गर्न सक्नुहुन्छ । जसले तपाइको बचत र विभिन्न जोखिमको रक्षावरण गर्ने काम पनि गर्न सक्छ । बच्चाको जीवन बीमा गर्दा बाबु आमाको जोखिम वरण गर्ने र बच्चाको भविष्यको बचत पनि हुने हुँदा यो तर्फ ध्यान दिनु पर्ने आवश्यकता छ ।
यो मात्रै होइन, मानौ तपाइले यो दशैँमा १ हजार ५०० रुपैयाँ मात्रै दक्षिणा पाउनु भयो । यो बाट तपाइले बीमा गर्न नसक्नुहोला । तर, तपाइले १ हजार रुपैयाँमा पब्लिक कम्पनीले जारी गर्ने आईपीओ फर्न सक्नुहुन्छ । अहिलेको अवस्थामा तपाइलाई आईपीओ परेको खण्डमा त्यो कम्तिमा पनि ८–१० हजार रुपैयाँ पुग्छ नै । तपाइको लगानी १ हजार रुपैयाँ र तपाइले ७–८ हजार नाफा गर्नु भयो । त्यो नै तपाइको जीवनको टर्निङ प्वाइन्ट बन्न सक्छ । एक हजारले १० हजार कमाए पछि तपाइले फेरि १० वटा कम्पनीको आईपीओमा आवेदन दिन पुग्ने भयो । होइन तपाइ त्यसमा १० हजार थपेर २० हजार लगानी गरेर पुँजी बजारको दोस्रो बजारमा पनि प्रवेश गर्न सक्नुहुन्छ ।
हामीहरुले बालबालिकालाई अनावश्यक खर्च भन्दा पनि सानै देखि बचत गर्ने र लगानी गर्ने कुराको विषय सिकाउन आवश्यक छ । केही रुपैयाँ त हो सानै त छ नि भनेर भन्ने भन्दा पनि यो समयलाई नै शुन्य र सुरुवात मानेर त्यस तर्फ लाग्न सकियो भने जीवनमा आइपर्ने जटिलतासँग जुध्नका लागि सहज हुने छ । त्यसैले यो दशैँको दक्षिणाले तपाइको जीवनमा परिवर्तन ल्याउन सक्छ । सानो भए पनि लगानी गर्ने र बचत गर्ने बानीको विकास गरौँ । एक हजार रुपैयाँ त हो नि भनेर पिकनिक वा अन्य फजुल खर्चमा नसक्नुहोस् । विजयादशमी २०८३ को हार्दिक मंगलमय शुभकामना
