एक सय ७५ रनको लक्ष्य पछ्याएको जनकपुरले सात विकेटमा १७२ रन बनाएपछि विराटनगर चार अंकसहित प्लेअफ समीकरणमा कायम रह्यो।
काठमाडौं– नेपाल प्रिमियर लिग (एनपीएल) इतिहासकै सर्वाधिक रोमाञ्चक खेलमध्ये रहेको प्रतिस्पर्धामा विजयी रहेपछि विराटनगर किंग्सका कप्तान सन्दीप लामिछानेले राहत महसुस गरेका छन् ।
सन्दीपले भने, ‘तनावपूर्ण खेल रह्यो । अन्तिम बलसम्म रोमाञ्चकता कायम रह्यो । अन्त्यमा हामी नै जित्यौं, त्यसैले खुसी रह्यौं । दुई खेल जितेपछि हामी प्लेअफ समीकरणमा कायम रहेका छौं । एन्ड्रे रसेलको प्रदर्शन आफैंमा उत्कृष्ट रह्यो । उनले ब्याट र बल दुवैबाट निर्णायक प्रदर्शन गरे ।’
विराटनगर सुरुमा दुई खेल हारेपछि त्यसपछिका दुई खेल जित्न सफल रहेको हो । यससँगै चार अंकमा विराटनगर प्लेअफको समीकरणमा कायम रह्यो । जनकपुर पनि चार अंकमै रह्यो ।
अन्तिम ओभरमा १३ र अन्तिम बलमा तीन रन चाहिएको स्थितिमा जनकपुर त्यसलाई आत्मसात् गर्न सकेन । विराटनगर अन्तिम बलमा विजयी रहेको हो ।
जितका लागि १ सय ७५ रन पछ्याएको जनकपुरले जवाफमा सात विकेट गुमाएर १ सय ७२ रन मात्र बनाउन सक्यो । अन्तिम ओभर एन्ड्रे रसेलले गरेका थिए र उनी नै ‘प्लेयर अफ द म्याच’ भए ।
उनले भने, ‘अन्तिम ओभर सजिलो रहेन । मलाई हाम्रो स्कोर विजयी हुने खालको लागेको थियो, तर त्यस्तो भएन । नेपालमा खेल्न पाएकोमा म खुसी महसुस गरिरहेको छु । विराटनगरका समर्थकप्रति आभारी पनि छु ।’
खेलपछि जनकपुरका कप्तान हरमित सिंहले हारमा निराशा पोखे । उनले भने, ‘हामी हारे पनि खेल रोमाञ्चक रह्यो । खेलको धेरै समय दुवै टिम बराबरीको स्थितिमा रहे । तर हामी अन्त्यतिर चुक्यौं ।’
