पतञ्जली जग्गा प्रकरणको मुद्दा विशेष अदालतमा विचाराधीन नै रहेको अवस्थामा नेपालविरुद्ध मंगलबार अर्को भ्रष्टाचार मुद्दा दायर भएको हो ।
काठमाडौं — पूर्वप्रधानमन्त्री माधवकुमार नेपालविरुद्ध व्यक्तिगत रुपमा दोस्रो भ्रष्टाचार मुद्दा दायर भएको छ । यसअघि पतञ्जली जग्गा प्रकरणमा भ्रष्टाचार मुद्दा खेपिरहेका नेपालविरुद्ध मंगलबार मोरङको सार्वजनिक जग्गा हिनामिना गरेको अभियोगमा मुद्दा दायर भएको हो । पतञ्जली प्रकरणको मुद्दा विशेष अदालतमा विचाराधीन नै रहेको अवस्थामा अर्को मुद्दा दायर भएको हो ।
जेठ २०८२ मा पतञ्जली प्रकरणमा नेपालसहित ९३ जनालाई विपक्षी बनाउँदै १८ करोड ५८ लाख बिगो दाबी गरिएको थियो । मोरङको जग्गा प्रकरणमा अख्तियार दुरुपयोग अनुसन्धान आयोगले पूर्वप्रधानमन्त्री तथा नेकपाका सहसंयोजक नेपालसहित कांग्रेस नेता एवं पूर्वमन्त्री डा. मिनेन्द्र रिजालसहित ९७ जनलाई प्रतिवादी बनाएको छ ।
उनीहरूविरुद्ध करिब साढे ७३ करोड रुपैयाँ बिगो माग दाबी गरिएको छ । पछिल्लो मुद्दामा पूर्वभूमि सुधारमन्त्री डम्बर श्रेष्ठ, सवारी दुर्घटनामा त्रिशूली नदीमा बेपत्ता भएका पूर्वमुख्यसचिव माधव घिमिरेकी छोरी कमला घिमिरेको नाम पनि प्रतिवादीको सूचीमा छ । पूर्वसचिव छविराज पन्त, पूर्वसहसचिव रमेशचन्द्र अधिकारी, तत्कालीन उपसचिवहरू गान्धीप्रसाद सुवेदी, हुपेन्द्रमणि केसी, नुरपति कँडेल, हरिराज पन्त, डा. अर्जुन खड्का, लक्षमण थापा, ध्रुव सापकोटा र शाखा अधिकृत बलराम निरौलालाई प्रतिवादी बनाएको छ ।
दुर्गा कान्तिपुर मिडिया ग्रुपका कानुन संवाददाता हुन् । उनी कानुन, न्याय र संवैधानिक मामिलाबारे रिपोर्टिङ गर्छन् ।
