खेल पत्रकारिता, पुस्तक लेखन र डकुमेन्ट्री निर्माणमा सक्रिय टीएस ठकुरी फिक्ट्सको नेपाल प्रतिनिधिका रूपमा कार्यरत रहँदै आएका छन् ।
नेपालगन्ज — धारा नेपालगन्ज म्याराथनका संस्थापक टीएस ठकुरी फेडरेसन अफ इन्टरनेसनल सिनेमा टेलिभिजन स्पोर्ट्स (फिक्ट्स) कमिसनमा नियुक्त भएका छन् ।
फिक्ट्स खेलुकद संस्कृति प्रवर्द्धनमा कार्यरत विश्वव्यापी सञ्जाल हो । इटालीको मिलानोमा जारी फिक्ट्सको ४१औं महासभाले फिक्ट्स कार्यसमितिको प्रस्ताव अनुमोदन गर्दै ४ वर्षका लागि कमर्सियल पार्टनरसिप ब्रोडकास्टिङ सर्भिसेज कमिसनमा नेपालबाट ठकुरीलाई नियुक्त गरेको हो । खेलकुदसम्बन्धी वृत्तचित्रहरूको फिक्ट्स वर्ल्ड फेस्ट र फिक्ट्स महासभा यही ३० अक्टोबरदेखि २ नोभेम्बरसम्म मिलानमा सम्पन्न भएको हो ।
खेल पत्रकारिता, पुस्तक लेखन र डकुमेन्ट्री निर्माणमा सक्रिय ठकुरी फिक्ट्सको नेपाल प्रतिनिधिका रूपमा कार्यरत रहँदै आएका छन् । उनी वर्ल्ड रनिङको छाता संगठन एसोसिएसन अफ इन्टरनेसनल म्याराथन एण्ड डिस्टेन्स रेस (एम्स) का नेपाल प्रतिनिधि समेत हुन् ।
