टस हारेर पहिले ब्याटिङ गरेको चितवनले निर्धारित २० ओभरमा ६ विकेट गुमाउँदै १२९ रन बनाएपछि सुदूरपश्चिमले जितका लागि १३० रन बनाउनुपर्ने भएको छ।
काठमाडौँ — चितवन राइनोजले नेपाल प्रिमियर लिग क्रिकेटको सोमबारको दोस्रो खेलमा सुदूरपश्चिम रोयल्सलाई १ सय ३० रनको लक्ष्य दिएको छ । सुदूरपश्चिमका कप्तान दीपेन्द्रसिंह ऐरीले टस जितेपछि ब्याटिङको निम्तो पाएको चितवनले निर्धारित २० ओभरमा ६ विकेट गुमाई १ सय २९ रन बनायो ।
चितवनले देव खनाललाई ७ रनमै गुमाएको थियो । अर्का ओपनर डेविड मलान १७ बल खेली १ चौका प्रहार गरी १६ र अर्जुन साउद १६ बल खेली समान १ चौका र १ छक्का प्रहार गरी १५ रनमा आउट भए ।
चितवनको कप्तानी सिकन्दर रजाले गरेका थिए । अघिल्लो खेलमा रवि बोपाराले चितवनको कप्तानी गरेका थिए । जिम्बावेबाट खेलिरहेका कारण रजा भने त्यो खेलमा थिएनन् । अघिल्ला दुई सिजन कप्तानी गरेका कुशल मल्ल सोमबारको खेलमा पनि प्लेइङ ११ मा रहेका छैनन् ।
रजाले २० बल खेली १ चौकासहित १५ रनमात्र बनाउन सके । उनलाई देब्रेहाते स्पिनर अनिल खरेलले आउट गरे । बोपाराले सर्वाधिक ४९ रन बनाए । सो क्रममा उनले सबै खाले ट्वान्टी–२० मा १० हजार रन पूरा गरेका थिए । बोपाराले ४० बलको इनिङ्समा ३ चौका र २ छक्का प्रहार गरे ।
सुदूरपश्चिमका स्कट कुग्लेनले ४ ओभरमा २७ रन खर्चेर २ विकेट लिए । हेमन्त धामी, कप्तान दीपेन्द्रसिंह ऐरी र अनिलले १–१ विकेट लिए ।
चितवनले पहिलो खेलमा विराटनगर किंग्सलाई ८ रनले पराजित गरेको थियो । तर लुम्बिनी लायन्ससँगको टोलीको दोस्रो खेल वर्षाका कारण टस पनि हुन नपाई रद्द भएको थियो ।
सुदूरपश्चिम ३ खेलमा २ हार र १ जितका साथ ८ टिम सहभागी प्रतियोगिताको अंकतालिकामा सातौं स्थानमा छ । पहिलो खेलमा लुम्बिनी लायन्ससँग ७ विकेटले पराजित सुदूरपश्चिमले दोस्रो खेलमा पोखरा एभेन्जर्सलाई ६ विकेटले पराजित गरेको थियो । तर तेस्रो खेलमा टोली विराटनगर किंग्ससँग ३५ रनले पराजित भएको थियो ।
विनोद पाण्डे कान्तिपुरका खेलकुद ब्यूरो प्रमुख हुन् ।
