सोमबार सम्पन्न खेलमा न्यू स्टारले आयोजक एड्भान्स क्लबलाई ट्राइब्रेकरमा पराजित गर्दा प्लानिङ ब्वाइजले खाँदबारी युथ क्लबलाई हराउँदै अन्तिम चारमा प्रवेश गरेको हो ।
संखुवासभा — संखुवासभाको खाँदबारीमा सोमबारदेखि जारी संखुवासभा गोल्डकप फुटबल प्रतियोगितामा धरानको न्यू स्टार क्लब र काठमाडौंको प्लानिङ ब्वाइज युनाइटेडले सेमिफाइनलमा स्थान सुरक्षित गरेका छन् । सोमबार सम्पन्न खेलमा न्यू स्टारले आयोजक एड्भान्स क्लबलाई ट्राइब्रेकरमा पराजित गर्दा प्लानिङ ब्वाइजले खाँदबारी युथ क्लबलाई हराउँदै अन्तिम चारमा प्रवेश गरेको हो ।
प्रतिस्पर्धात्मक खेलमा न्यू स्टार क्लबले आयोजक एड्भान्स क्लबलाई ट्राइब्रेकरमा ५–४ गोलले पराजित गर्यो । निर्धारित समयमा दुवै टोलीले गोल गर्न नसकेपछि खेलको निर्णय ट्राइब्रेकरबाट लिइएको थियो ।
खेलको सुरुदेखि नै दुवै टोली आक्रामक रूपमा प्रस्तुत भएका थिए । पटकपटक गोल गर्ने अवसर मिले पनि निर्धारित समयमा दुवै पक्ष गोल गर्न असफल भए । अन्ततः ट्राइब्रेकरमा उत्कृष्ट प्रदर्शन गर्दै न्यू स्टारले सेमिफाइनल यात्रा तय गर्यो ।
सोमबार नै सम्पन्न अर्को खेलमा काठमाडौंको प्लानिङ ब्वाइज युनाइटेडले खाँदबारी युथ क्लबलाई पराजित गर्यो । खेलको दोस्रो हाफ सुरु भएको तेस्रो मिनेट अर्थात् ४८औँ मिनेटमा प्लानिङ ब्वाइजका फागुराम थारूले गरेको गोल नै निर्णायक बन्यो । थारूको उक्त गोलसँगै प्लानिङ ब्वाइजले जित निकाल्दै प्रतियोगिताको अन्तिम चारमा आफ्नो स्थान पक्का गर्यो ।
प्रतियोगिताअन्तर्गत मंगलबार पनि दुई खेल सञ्चालन हुनेछन् । पहिलो खेलमा सिरहाको सलहेश युवा क्लब र लोहोरुङ क्लब पाङ्माबीच प्रतिस्पर्धा हुनेछ । दोस्रो खेलमा झापा–११ फुटबल क्लब र सेकाहा सामुदायिक विकास क्लब आमनेसामने हुनेछन् ।
अरुण उपत्यका सामुदायिक विकास क्लब (एड्भान्स) को आयोजनामा सञ्चालित प्रतियोगितामा आठ टोली सहभागी छन् ।
प्रतियोगितामा आयोजक एड्भान्स क्लबसहित सुनसरीको न्यू स्टार क्लब, सिरहाको सलहेश युवा क्लब, लोहोरुङ क्लब पाङ्मा, काठमाडौंको प्लानिङ ब्वाइज युनाइटेड, खाँदबारी युथ क्लब, झापा–११ फुटबल क्लब र सेकाहा सामुदायिक विकास क्लबले प्रतिस्पर्धा गरिरहेका छन् । प्रतियोगिताको फाइनल कात्तिक २० गते शुक्रबार हुनेछ ।
