बुटवलमा आयोजित पत्रकार भेटघाट कार्यक्रममा महासचिव पोखरेलले राज्यको जिम्मेवार ओहदामा बस्ने व्यक्ति संयमित र जिम्मेवार हुनुपर्नेमा सत्ता सञ्चालनलाई मजाकको विषय बनाइएको टिप्पणी गरे ।
बुटवल — नेकपा एमालेका महासचिव शंकर पोखरेलले सरकार प्रमुखले राज्य सञ्चालनलाई खेलौना जस्तो बनाएको आरोप लगाएका छन् । सरकारका हरेक गतिविधि संविधान र लोकतन्त्रलाई कमजोर बनाउने दिशामा अघि बढेको उनको दाबी छ ।
प्रेस चौतारी नेपाल, रुपन्देहीले सोमबार बुटवलमा आयोजना गरेको पत्रकार भेटघाट कार्यक्रममा महासचिव पोखरेलले राज्यको जिम्मेवार ओहदामा बस्ने व्यक्ति अझै संयमित र जिम्मेवार हुनुपर्नेमा सत्ता सञ्चालनलाई मजाकको विषय बनाइएको टिप्पणी गरे । ‘जिम्मेवार पदमा रहेका व्यक्तिहरू अत्यधिक संयमित र उत्तरदायी हुनुपर्नेमा सामाजिक सञ्जालका गतिविधिले राज्यको जिम्मेवारीलाई बालबालिकाले खेल्ने भाँडाकुटी खेले जस्तो बनाइएको छ,’ उनले भने, ‘यस्ता गतिविधिले लोकतन्त्र, संविधान र राज्यका संवैधानिक अंगहरूलाई कमजोर बनाइरहेको छ ।’
प्रधानमन्त्रीका प्रमुख सल्लाहकारले नै ‘तिम्रो नाम २८ जनाको सूचीमा परेन भने तिमी के पत्रकार ?’ भन्दै पत्रकारहरूलाई नै मेन्सन गरिरहेको उनले बताए । ‘राज्य यस्तो प्रकारको ठट्टा मजाकको विषय बन्न सक्दछ ? जति जिम्मेवार ओहदामा भयो त्यति ज्यादा संयमित र जिम्मेवार हुनुपर्दछ,’ उनले भने, ‘तर आज हाम्रा मुलुकका कार्यकारी भूमिकामा रहेका मान्छेहरूका सोसल मिडियाका गतिविधिहरू हेर्ने हो, पढ्ने हो भने राज्य बालबालिकाहरूले खेल्ने भाँडाकुटी जस्तो विषय बनाइएको छ । राज्य राज्यजस्तो छैन, सरकार सरकारजस्तो छैन ।’
सरकारका अहिलेका सबै गतिविधिले मुलुकको लोकतान्त्रिक व्यवस्थाको भविष्यमाथिसमेत संकट उत्पन्न हुने संकेतहरू देखिएको उनले बताए । विद्यार्थी संगठन, ट्रेड युनियन, व्यावसायिक संगठन र सञ्चारमाध्यममाथि राज्यको नियन्त्रण बढ्दै गएको समेत उनले बताए ।
लोकतन्त्रको आधार संगठित हुने र अभिव्यक्ति स्वतन्त्रताको अधिकार भए पनि पछिल्लो समय विद्यार्थी संगठनका गतिविधि प्रतिबन्धित गर्ने, विश्वविद्यालय तथा क्याम्पसमा ट्रेड युनियन अधिकार नियन्त्रण गर्ने र व्यावसायिक संगठनलाई समेत गतिविधि नगर्न निर्देशन दिने जस्ता काम अहिले सरकारबाटै भइरहेको उनले बताए । सरकारका गतिविधिप्रति स्वयं रास्वपा समेत सन्तुष्ट नरहेको पोखरेलको दाबी छ ।
घनश्याम गौतम कान्तिपुरका बुटवल संवाददाता हुन् ।
