ओख्रेनी र र्‌यालेमा तीन वर्षअघि पोल गाडिए, बत्ती अझै बलेन

तीन वर्षअघि पोल गाडिए पनि लाइन विस्तार रोकिँदा शारदा नगरपालिका–७ का ओख्रेनी र र्‍यालेका बासिन्दा सौर्य बत्ती र टुकीको भरमा छन्।

सल्यान — तीन वर्षअघि गाउँमा बिजुलीका पोल गाडिएपछि ओख्रेनी र र्‌यालेका बासिन्दाले घरमा बत्ती बल्ने आशा गरेका थिए। तर, पोल गाडेर गएको निर्माण कम्पनीको ठेकेदार अहिलेसम्म नफर्केपछि उनीहरूको आशा निराशामा बदलिएको छ। शारदा नगरपालिका–७ का यी दुई बस्तीका ५० घरधुरी अझै बिजुलीको सुविधाबाट वञ्चित छन्। रातको उज्यालोका लागि उनीहरू सौर्य बत्ती र टुकीको भर पर्न बाध्य छन्।

आफ्नो बस्तीनजिकैका अन्य घरमा बिजुली बलेको तीन वर्ष बितिसक्दा पनि आफ्नो घरमा बत्ती बाल्न नपाएपछि स्थानीयले छिटोभन्दा छिटो लाइन विस्तार गरी विद्युत् सेवा उपलब्ध गराउन सम्बन्धित निकायसँग माग गर्दै आएका छन्।

जिल्लालाई पूर्ण विद्युतीकरण गर्ने उद्देश्यले ग्रामीण विद्युतीकरण कार्यक्रमअन्तर्गत ओख्रेनी र र्‌यालेमा महाशक्ति जेभीले २०८० असोजमा निर्माणको काम सुरु गरेको थियो। तर, कम्पनीले सुरुमा २५ थान पोल ल्याएर छाड्यो। स्थानीयलाई खाल्डो खन्न र पोल गाड्न लगाएपछि ठेकेदार फर्किएर नआएको स्थानीयको गुनासो छ। त्यसपछि योजना अलपत्र परेको स्थानीय खुमबहादुर रोकाले बताए।

ठेकेदारले बेवास्ता गर्दा ल्याइएका केही पोल अहिले पनि लथालिङ्ग अवस्थामा रहेको उनले जानकारी दिए। 'हामीले निर्माणको काम छिटो सम्पन्न गर्नका लागि सम्बन्धित निकाय पुगेर माग राख्दै आएका छौं तर निर्माण कम्पनीका ठेकेदार अहिलेसम्म आएको छैन। गाडेका पोल ढल्ने अवस्थामा पुगेका छन्। योजनाको काम सम्पन्न हुन नसक्दा हामी अहिले पनि अन्धकारमा बस्न बाध्य छौं,' उनले भने।

गाउँको विद्युतीकरण योजना अलपत्र पर्दा स्थानीयले दैनिक जीवनमा समेत समस्या भोग्नुपरेको स्थानीयको गुनासो छ। बत्ती नहुँदा रातको समयमा कठिनाइ हुने गरेको स्थानीय ललिता बुढाथोकीले बताइन्। बिजुली आउने आशामा केहीले १५ देखि २० हजार रुपैयाँ खर्च गरेर घरमा वायरिङसमेत गरिसकेका छन्। तर, बिजुली नपुग्दा त्यो लगानी उपयोगविहीन भएको छ। 'बत्ती आउँछ भनेर घरमा १५/२० हजार खर्च गरी केहीले वायरिङ गरेका छन्। त्यो त्यत्तिकै छ। रातको समयमा बालबालिकाले पढ्न पाउँदैनन्। मोबाइल चार्ज गर्न नजिकै बस्तीमा आफन्तको घरमा जानुपर्छ। अनलाइनबाट हुने सरकारी काममा बाधा पुगेको छ,' उनले भनिन्। बत्तीका लागि पटकपटक माग राख्दै आए पनि सुनुवाइ नभएको उनको गुनासो छ।

शारदा नगरपालिका–७ का वडाध्यक्ष लीलाबहादुर रोकाले ठेकेदारको बेवास्ताका कारण निर्माणको काम अलपत्र परेको बताए। ५० भन्दा बढी घरमा बिजुली पुर्‍याउने उद्देश्यले २०८० असोजमा सुरु गरिएको योजनाका लागि अहिलेसम्म आवश्यक पोललगायत सामग्रीसमेत नआएको उनले जानकारी दिए।

'योजना सुरु गरेको एक वर्षमा सम्पन्न गर्नुपर्ने योजनाको सम्बन्धित निकायले दुई पटकभन्दा बढी म्याद थप गरिसकेको छ तर काम सम्पन्न गर्नका लागि अहिलेसम्म ठेकेदार आएको छैन। ठेकेदार सम्पर्कविहीनजस्तै छ,' उनले भने, 'निर्माणको काम रोकिँदा स्थानीय अन्धकारमा बस्न बाध्य छन्।'

ग्रामीण विद्युतीकरण कार्यक्रमअन्तर्गत जिल्लाका आठवटै पालिकामा काम भइरहेकाले निर्माण कम्पनीका ठेकेदार तथा कामदारले ओख्रेनी र र्‌यालेको काम गर्न नभ्याएको हुन सक्ने नेपाल विद्युत् प्राधिकरण सल्यानका प्रमुख नरेशदत्त रावलले बताए। जिल्लाका अन्य पालिकामा भने कामदारले काम गरिरहेको उनले जानकारी दिए।

ग्रामीण विद्युतीकरण आयोजना सुर्खेतका इन्जिनियर प्रवीण गिरीले पोल, ट्रान्सफर्मरलगायत सामग्री समयमै उपलब्ध गराउन नसक्दा जिल्लाको पूर्ण विद्युतीकरण प्रभावित भएको बताए। यसै कारण निर्धारित समयमा काम सम्पन्न हुन नसकेको उनको भनाइ छ। उनका अनुसार सल्यानका विभिन्न पालिकामा निर्माण कम्पनीले हालसम्म ९५ प्रतिशत काम सम्पन्न गरिसकेको छ। सल्यानलाई पूर्ण विद्युतीकरण गर्न सरकारले विद्युत् लाइन विस्तारका लागि सामग्री खरिदबाहेक १० करोड रुपैयाँ विनियोजन गरेको पनि उनले जानकारी दिए।

विप्लव महर्जन कान्तिपुरका सल्यान संवाददाता हुन् ।