पूर्वबाट पश्चिम जाँदै गरेको ट्रक र विपरीत दिशाबाट आइरहेको मोटरसाइकल लमही-भालुवाङ सडकखण्ड अन्तर्गत बाघढड्डीमा सोमबार बिहान ठोक्किएका थिए । दुर्घटनामा दुई जना घाइते भएका छन् ।
दाङ — देउखुरीमा ट्रक र मोटरसाइकल ठोक्किँदा मोटरसाइकल चालकको मृत्यु भएको छ । दुई जना घाइते छन् ।
पूर्वबाट पश्चिम जाँदै गरेको लु १ ख ९२४८ नम्बरको ट्रक र विपरीत दिशाबाट आइरहेको प्रदेश ३-०२-०१० प ६९२२ नम्बरको मोटरसाइकल लमही-भालुवाङ सडकखण्ड अन्तर्गत राप्ती गाउँपालिका-३ बाघढड्डीमा सोमबार विहान ठोक्किएका थिए । दुर्घटनामा मोटरसाइकल चालक राप्ती गाउँपालिका- ६ भगवानपुरका ३१ वर्षीय प्रवीण चौधरीको मृत्यु भएको छ । गम्भीर घाइते चौधरीलाई भालुवाङ अस्पतालमा उपचारका क्रममा चिकित्सकले मृत घोषणा गरेका थिए ।
दुर्घटनामा मोटरसाइकलमा सवार राप्ती गाउँपालिका-३ मसुरियाका १६ वर्षीय निशु चौधरी र १९ वर्षीया करिना चौधरी घाइते भएका छन् । घाइते दुवैको बुटवलमा उपचार भइरहेको इलाका प्रहरी कार्यालय भालुवाङले जानकारी दिएको छ ।
दुर्गालाल केसी कान्तिपुरका दाङ संवाददाता हुन् ।
