कर्णालीमा नयाँ अनुबन्धित जिसनले गाेर्खाजविरुद्ध खेल्ने

कर्णाली याक्सले तेस्रो नेपाल प्रिमियर लिगका लागि टेष्ट राष्ट्र बंगलादेशका युवा ब्याटर जिसन अलामलाई अनुबन्ध गरेको छ ।

काठमाडौँ — कर्णाली याक्सले तेस्रो नेपाल प्रिमियर लिगका लागि टेष्ट राष्ट्र बंगलादेशका युवा ब्याटर जिसन अलामलाई अनुबन्ध गरेको छ ।

जिसनलाई बाँकी खेलका लागि अनुबन्ध गरेको कर्णाली याक्सका अध्यक्ष गृहेन्द्र घिमिरेले जानकारी गराएका छन् । अध्यक्ष घिमिरेले जिसनको आगमनसँगै टिमको शीर्षक्रम बलियो हुने विश्वास व्यक्त गरे ।

कर्णाली याक्सले सोमबार आफ्नो तेस्रो खेलमा काठमाडौं गोर्खाजसँग खेल्दै छ । यस खेलमा जिसन उपलब्ध हुनेछन् ।

पहिलो दुबै खेलमा जित निकाल्दै कर्णालीले प्रभावशाली सुरुवात गरिसकेको छ । कर्णालीले पहिलो खेलमा जनकपुर बोल्ट्सलाई १९ रन र विराटनगर किंग्सलाई ४ विकेटले हराएको थियो ।

जिसन पछिल्लो समय राम्रो लयमा रहेका कारण अनुबन्ध गरेकाे र उनकाे आगमनपछि कर्णाली याक्सको शीर्षक्रम बलियो अझै बलियो हुने घिमिरेकाे विश्वास छ । अध्यक्ष घिमिरेले टिममा दुई बंगलादेशी खेलाडी रहिसकेकाले जिसमलाई पनि नेपालको वातावरणमा खेल्न सहज हुने बताउँछन् ।

जिसन कर्णालीमा अनुबन्ध हुने तेस्रो बंगलादेशका खेलाडी हुन् । यसअघि अरिफुल इस्लाम र अकवर अली अनुबन्ध भएका थिए । २१ वर्षीय ब्याटिङ अलराउण्डर जिसनले बंगलादेशको यु–१९ हुँदै ए टिमबाट खेलिसकेका छन् ।

बंगलादेशको फ्रेन्चाइज टोलीहरु राजशाही वारियर्स र दुरबार राजशाहीबाट खेलेका छन् । उनले लिष्ट ए मा ४९ खेल खेल्दै १ हजार २९५ रन बनाएका थिए । त्यस्तै, २७ टी–२० आईमा ५ सय ७१ रन बनाएका छन् ।

जिसनले अस्ट्रेलियामा भएको टप एण्ड टी–२० शृंखलामा नेपालविरुद्ध पनि सानदार प्रदर्शन गरेका थिए ।