क्यानडाको अन्टारियोमा चिठ्ठामार्फत ४ अर्ब ३६ करोड क्यानडेली डलर (करिब ४ अर्ब ३६ करोड रुपैयाँ) जितेका व्यक्तिले टिकटको म्याद सकिन केही घण्टा मात्रै बाँकी रहँदा पुरस्कार दाबी गरेका छन्।
अन्टारियो लटरी एन्ड गेमिङ कर्पोरेसन (ओएलजी) का अनुसार पुरस्कार जित्ने टिकटधनीले म्याद समाप्त हुनुअघि नै आफ्नो दाबी पेस गरेका हुन्। उक्त टिकटको म्याद गत बुधबार मध्यरातमा सकिँदै थियो।
ओएलजीका सञ्चार सम्बन्ध निर्देशक टोनी बिटोन्टीले बीबीसीलाई बताएअनुसार लटरी बिक्री केन्द्रको टर्मिनलमार्फत टिकटको प्रमाणीकरण गरिएको थियो।
कर्पोरेसनले लोटो म्याक्स ज्याकपट जित्ने टिकटधनीको खोजी गरिरहेको थियो। उक्त टिकट करिब एक वर्षअघि, सन् २०२५ अक्टोबर २८ मा अन्टारियोको ग्रे काउन्टीस्थित एउटा खुद्रा पसलबाट खरिद गरिएको थियो।
लटरी कर्पोरेसनले टिकट खरिद गर्ने व्यक्तिलाई आफ्ना कपडाका खल्ती, हातले बोक्ने झोला, ब्याकप्याक, पर्स तथा गाडीको ग्लोभ कम्पार्टमेन्टलगायतका स्थानमा टिकट खोज्न आग्रह गरेको थियो।
ओएलजीले विजेताको नाम सार्वजनिक गरेको छैन। टिकटको वास्तविक मालिकसँग सम्पर्क गरी उनी नै टिकटधनी भएको पुष्टि गरेको जनाएको छ।
कम्पनीले जारी गरेको विज्ञप्तिमा भनिएको छ, “टिकटको वास्तविक स्वामित्व पुष्टि भएपछि ओएलजीले विजेताको सम्मानमा विशेष समारोह आयोजना गर्नेछ। साथै, विजेताबारे जानकारी सार्वजनिक गर्ने आफ्नो प्रक्रियाअनुसार उनको कथा सञ्चारमाध्यम र सर्वसाधारणसँग साझा गर्नेछ।”
अन्टारियोको ग्रे काउन्टी लोकप्रिय पर्यटकीय गन्तव्य हो। त्यसैले उक्त क्षेत्रमा घुम्न गएका कुनै व्यक्तिले टिकट खरिद गरेर घर फर्किएपछि त्यसको नतिजा जाँच गर्न बिर्सिएको हुन सक्ने ओएलजीको अनुमान थियो।
बिटोन्टीले बुधबार यसअघि सीटीभी न्युजसँग कुरा गर्दै टिकट ओएलजीको मोबाइल एप वा कुनै पसलमा जाँच नगरिएकोमा दुःख व्यक्त गरेका थिए।
ओएलजीका अनुसार ज्याकपट जित्ने नम्बर ०६, १४, १७, १९, २६, ४३ र ४५ थिए। बोनस नम्बर २७ थियो।
यदि टिकटको म्याद समाप्त भएको भए ४ अर्ब ३६ करोड क्यानडेली डलरको पुरस्कार रकम कर्पोरेसनले भविष्यका लटरी खेलका लागि राख्ने थियो।
क्यानडामा यसअघि पनि ठूलो रकमको चिठ्ठा जितेर पुरस्कार दाबी गर्न कोही नआएका घटना छन्।
सन् २०२२ जुन २८ मा अन्टारियोको स्कारबोरोमा लोटो म्याक्सको सात करोड डलरको ज्याकपट जितिएको थियो। तर, पुरस्कार दाबी गर्न कुनै पनि टिकटधनी आएनन्।
त्यतिबेला ओएलजीले उक्त टिकटबारे जानकारी लिन दुई हजार सात सय जनाले फोन तथा इमेलमार्फत सम्पर्क गरेको जनाएको थियो। तर, उनीहरूमध्ये कोही पनि वास्तविक विजेता थिएनन्।
बिटोन्टीका अनुसार प्रत्येक वर्ष चिठ्ठाका करिब एक प्रतिशत पुरस्कार रकम कसैले दाबी गर्दैनन्। यद्यपि, सामान्यतया दाबी नगरिने पुरस्कारको रकम निकै सानो हुने गरेको छ।
यसैबीच, गत साता अल्बर्टा प्रान्तका एक बासिन्दाले क्यानडाको इतिहासकै अहिलेसम्मको सबैभन्दा ठूलो नौ करोड डलरको लटरी ज्याकपट जितेका छन्। उनको पहिचान भने अहिलेसम्म सार्वजनिक गरिएको छैन।
प्रकाशित: १५ कार्तिक २०८३ १९:०६ आइतबार
-1200x560.jpg)
