भेरी करिडोर सडकखण्डअन्तर्गत जाजरकोट–डोल्पा खण्डमा शनिबार बिहान ११:१५ बजे अटो अनियन्त्रित भएर सडकबाट करिब ६० देखि ६५ मिटर तल खसेको हो ।
जाजरकोट — जाजरकोटको नलगाड नगरपालिका–८ मालुवामा अटो दुर्घटना हुँदा दुई जनाको मृत्यु भएको छ भने तीन जना गम्भीर घाइते भएका छन्।
भेरी करिडोर सडकखण्डअन्तर्गत जाजरकोट–डोल्पा खण्डमा शनिबार बिहान ११:१५ बजे अटो अनियन्त्रित भएर सडकबाट करिब ६० देखि ६५ मिटर तल खसेको हो ।
रुकुम पश्चिमको आठबिसकोट नगरपालिका–११ राडिबाट जाजरकोटको नलगाड–१२ तल्लुबगरतर्फ जाँदै गरेको लु.प्र.०१–००१ ह ०५२९ नम्बरको अटो दुर्घटना भएको प्रहरीले जनाएको छ ।
दुर्घटनामा जाजरकोटको नलगाड–९ घरङ्गाका १७ वर्षीय सन्तोष विक र ५५ वर्षीय रमेश विकको मृत्यु भएको छ । दुवैको नगर अस्पताल दल्लीमा उपचारका क्रममा मृत्यु भएको जिल्ला प्रहरी कार्यालय जाजरकोटका प्रहरी नायब उपरीक्षक बुद्धिसागर पुरीले जानकारी दिए ।
दुर्घटनामा नलगाड–२ डाँडागाउँका ३५ वर्षीय प्रेम परियार, वडा नम्बर ३ कड्केका २८ वर्षीय गोपाल परियार र अटो चालक रुकुम पश्चिमको आठबिसकोट–११ चौरका २२ वर्षीय करण परियार गम्भीर घाइते भएका छन्। घाइते तीनै जनालाई नेपालगन्जस्थित भेरी अस्पताल पठाइएको छ ।
