विवादपछि सुदूरपश्चिम र विराटनगरबीच ५ ओभरको खेल हुने, राति ९ बजे टस

नेपाल प्रिमियर लिग (एनपीएल) अन्तर्गत सुदूरपश्चिम रोयल्स र विराटनगर किंग्सबीचको खेल अन्ततः हुने भएको छ। वर्षाका कारण प्रभावित खेल सञ्चालन गर्ने विषयमा दुई टोलीबीच मतभेद देखिए पनि छलफलपछि ५ ओभरको खेल खेलाउने सहमति भएको हो।

यसअघि अम्पायरले दुवै टोलीबीच ५–५ ओभरको खेल गराउने निर्णय गर्दै साँझ ७:२५ बजे टस र ७:४१ बजे खेल सुरु गर्ने समय निर्धारण गरेका थिए। तर, भिजेको आउटफिल्डमा खेल्न सुरक्षित नहुने भन्दै सुदूरपश्चिम रोयल्सले उक्त निर्णयप्रति असहमति जनाएको थियो।

विषयमा सुदूरपश्चिमका कप्तान दीपेन्द्रसिंह ऐरी, मुख्य प्रशिक्षक मिसवाह उल हक, नेपाल क्रिकेट संघका सचिव पारस खड्का, अम्पायर र क्युरेटरबीच छलफल भएको थियो। विवादका क्रममा दीपेन्द्रसिंह ऐरीसहित सुदूरपश्चिमका खेलाडी मैदानबाट बाहिरिएका थिए भने विराटनगरका खेलाडी मैदानमै रहेका थिए।

लामो छलफलपछि खेल सञ्चालन गर्ने सहमति जुटेको हो। नयाँ तालिकाअनुसार राति ९ बजे टस हुनेछ भने दुवै टोलीले ५–५ ओभरको खेल खेल्नेछन्।