गत वर्ष ६२० रुपैयाँ समर्थन मूल्य र ३५ रुपैयाँ अनुदान पाएका किसानले यस वर्ष बढ्दो लागतअनुसार उचित मूल्य खोजेका छन्।
परासी — यस वर्ष उखुको मूल्य प्रतिक्विन्टल एक हजार रुपैयाँ तोक्न किसानले माग गरेका छन् । चिनीको मूल्य, उखु उत्पादन लागत र बजार भाउ बढेकाले त्यसको असर किसानमा पनि परेको भन्दै उनीहरूले मूल्य बढाउन माग गरेका हुन् । प्रतापपुर गाउँपालिकाका अध्यक्ष एवं उखु उत्पादक किसान संघका केन्द्रीय प्रवक्ता उमेशचन्द्र यादवले आर्थिक वर्ष २०८३/८४ का लागि उखुको न्यूनतम समर्थन मूल्य प्रतिक्विन्टल एक हजार रुपैयाँ तोक्नुपर्ने बताए । ‘वर्तमान चिनीको बजार मूल्य र उखु किसानहरूको उत्पादन लागतलाई आधार बनाएर आर्थिक वर्ष ०८३/०८४ मा उखुको न्यूनतम समर्थन मूल्य प्रतिक्विन्टल एक हजार तोक्नुपर्ने हाम्रो माग हो,’ उनले भने, ‘नेपाल सरकारले किसान, उद्योगी र सरकारबीच त्रिपक्षीय बैठक गरी सहमतिका आधारमा मंसिरको पहिलो साताभित्रै मूल्य निर्धारण गर्नुपर्दछ ।’ गत वर्ष सरकारले उखुको न्यूनतम समर्थन मूल्य प्रतिक्विन्टल ६ सय २० रुपैयाँ र अनुदान प्रतिक्विन्टल ३५ रुपैयाँ निर्धारण गरेको थियो । पश्चिम नवलपरासीमा रहेका चारवटा चिनी मिलमध्ये गत वर्ष लुम्बिनी सुगर मिल्स, सुनवल र बागमती सुगर मिल सञ्चालनमा आएका थिए । अघिल्लो वर्ष सञ्चालनमा रहेको इन्दिरा सुगर मिल भने गत वर्ष चलेन । यस वर्ष नवलपरासीमा करिब १० देखि १२ लाख क्विन्टल उखु उत्पादन हुने अनुमान छ ।
नवीन पौडल कान्तिपुरका नवलपरासी संवाददाता हुन् ।
