बुढीगण्डकीको भेल र छङ्गाछुर भिरबीच फसेको कुकुरलाई मौसमका कारण हेलिकोप्टरबाट उद्धार सम्भव नभएपछि जलमार्गबाट निकालिएको हो।
काठमाडौँ — २५ असोजमा गएको बुढीगण्डकी बाढीपछि चुमनुव्री–३ जगत पारी बगरमा फसेको कुकुरको उद्धार भएको छ । धादिङबाट आएको कायाकिङ र र्याफ्टिङ टोलीले कुकुरको उद्धार गरेको चुमनुव्री गाउँपालिकाका अध्यक्ष निमा लामाले बताए ।
चुमनुव्री–३ जगत र धार्चे गाउँपालिका–७ टाडोभर्याङ सीमा क्षेत्रमा फसेको कुकुरको २० दिनपछि उद्धार गरिएको हो । शुक्रबार दिउँसो कुकुरको उद्धार गरेर जगततर्फ ल्याइएको उनले बताए ।
एनिमल नेपाल संस्थासाग समन्वय गरेर कुकुरको उद्धार गरिएको हो । हेलिकोप्टरबाट कुकुरको उद्धारको तयारी गरिए पनि मौसम अनुकुल नहुँदा बिहीबार हेलिकोप्टरबाट उडान हुन सकेको थिएन । कुकुर र केही बाख्रा फसेको जानकारी पाएदेखि नै उद्धारका लागि पहल र समन्वय भएको भेटेरिनरी अस्पताल तथा पशु सेवा कार्यालयका प्रमुख प्रकाश अधिकारीले बताए । ‘हिजो (बिहीबार) हेलिकोप्टरबाट उद्धार गर्ने प्रयास गरेका थियौं, मौसम नखुल्दा सम्भव नभएपछि कायाकिङ र र्याफ्टिङ टोलीसँग समन्वय गरेर आज उद्धार टोली जगत पुगेको हो,’ उनले भने ।
२५ असोजको बाढीपछि जगतपारि बगरमा एउटा कुकुर र केही बाख्रा फसेका थिए । चुमनुव्री–३ जगत र धार्चे–१ को ठाडो भर्याङ सीमा क्षेत्रमा २५ असोजदेखि कुकुर फसेको थियो । कुकुरलाई वारि जगततर्फ आउन बुढीगण्डकीको भेलले रोकेको थियो भने पारि छङ्गाछुर भिर थियो । बगरमा फसेको कुकुर खानेकुरा अभावमा भोकभोकै भाौतारिएको थियो ।
अहिल जगतपारि बगरमा फसेका बाख्राहरूको उद्धारको प्रयास भइरहेको छ । मौसमको अवस्था बिग्रिएपछि हेलिकोप्टर उडानमा चुनौती देखेपछि कायकिङ र र्याफ्टिङ टोलीमार्फत पनि कुकुरको उद्धार भएको हो ।
भीमलाल श्रेष्ठ कान्तिपुर टेलिभिजनमा गोरखा जिल्लाको संवाददाताको रूपमा कार्यरत छन्।
