सल्यानमा जिप दुर्घटना : ३ जनाको मृत्यु, ६ घाइते [अपडेट]

जिल्ला प्रहरी कार्यालय सल्यानका प्रमुख प्रहरी नायब उपरीक्षक दीपक पातलीका अनुसार जिप दुर्घटनामा परेर साउने रोका, कृष्ण बस्नेत र सीता विकको मृत्यु भएको हो ।

सल्यान — सल्यानमा शुक्रबार बेलुकी ६:३५ बजे जिप दुर्घटना हुँदा तीन जनाको मृत्यु भएको छ भने ६ जना घाइते भएका छन् । जिल्लाको शारदा नगरपालिका–१ श्रीनगरबाट टाकुरातर्फ जाँदै गरेको लु १ ज २३६८ नम्बरको जिप सिद्धकुमाख गाउँपालिका–२ रातामाटे खोला नजिक भित्री सडक खण्डमा दुर्घटना भएको हो ।

जिल्ला प्रहरी कार्यालय सल्यानका प्रमुख प्रहरी नायब उपरीक्षक दीपक पातलीका अनुसार जिप दुर्घटनामा परेर साउने रोका, कृष्ण बस्नेत र सीता विकको मृत्यु भएको हो । उद्धार गरेर अस्पताल ल्याइएका उनीहरूको कर्णाली अस्पतालमा मृत्यु भएको हो । शव पोस्टमार्टमका लागि जिल्ला अस्पताल सल्यान ल्याइएको छ ।

जिप दुर्घटनामा घाइते भएका ६ जनाको श्रीनगरस्थित कर्णाली र शारदा अस्पतालमा उपचार भइरहेको छ । अवस्था गम्भीर भएपछि सुशीला चलाउने, देबू विक, कमल बुढाथोकी र रूपा बुढाथोकीलाई अस्पतालले रिफर गरेको प्रहरी नायब उपरीक्षक पातलीले जानकारी दिए । घाइते राधिका चलाउने र दीपक रोकाको कर्णाली अस्पतालमा उपचार भइरहेको उनको भनाइ छ । उनका अनुसार अनियन्त्रित भएर दुर्घटनामा परेको जिप सडकबाट १५० मिटर तल खसेको थियो । जिप दुर्घटनाको अनुसन्धान भइरहेको उनले बताए ।

विप्लव महर्जन कान्तिपुरका सल्यान संवाददाता हुन् ।