धनगढी एफसी र काठमाडौं स्पोर्ट्स डेभलपमेन्ट भेन्चर्सको साझेदारीमा स्थापित कम्पनीले फुटबल, क्रिकेटसहित अन्य खेलकुद गतिविधिमा लगानी विस्तार गर्नेछ ।
काठमाडौँ — फुटबल र क्रिकेटसँगै अन्य गतिविधि अगाडि बढाउने उद्देश्यले शुक्रबार सुदूरपश्चिम स्पोर्ट्स भेन्चर्सको स्थापना गरिएको छ । यसका लागि धनगढी एफसीले काठमाडौं स्पोर्ट्स डेभलपमेन्ट भेन्चर्स प्रालिसँग हातेमालो गरेको हो । धनगढी एफसीको स्थापना ६ वर्ष अगाडि भएको थियो । यसले नेपाल सुपर लिग (एनएसएल) मा सहभागिता जनाउँदै आएको छ ।
अन्य सामाजिक गतिविधिमा पनि संलग्न धनगढीले एनएसएलको सुरुआती दुई संस्करणको फाइनल खेलेको थियो । तेस्रो संस्करणमा भने यो प्ले–अफसम्म पुग्यो । काठमाडौं स्पोर्ट्स डेभलपमेन्ट भेन्चर्स प्रालिअन्तर्गतको काठमान्डु गोर्खाजले फ्रेन्चाइज क्रिकेट नेपाल प्रिमियर लिग (एनपीएल) खेल्दै आएको छ । प्रतियोगिताका सुरुआती संस्करणमध्ये दोस्रो सिजन काठमान्डु गोर्खाज प्लेअफसम्म पुगेको थियो । नयाँ कम्पनीमा धनगढी एफसीका सुवास शाही र काठमाडौं स्पोर्ट्स डेभलपमेन्टको समान लगानी रहनेछ ।
यस सम्झौताअनुसार सुदूरपश्चिम स्पोर्ट्स कम्पनीको अध्यक्षमा उपेन्द्र महतो रहनेछन् भने शाही सञ्चालक तथा अनुभव स्वाँर सिरोहिया कार्यकारी निर्देशक हुनेछन् । यसको बोर्डमा पछि सदस्य थपिने जनाइएको छ ।
यसले अब भर्खरै घोषणा भएको नेपाल फुटबल लिग (एनएफएल) मा सहभागिता जनाउने छ भने ग्रासरुट र महिला फुटबलको विकासमा पनि लगानी गर्नेछ ।
शाहीले नयाँ कम्पनीबारे भनेका छन्, ‘यो लगानीले नेपाली फुटबलमा ठूलो सन्देश जानेछ र यसलाई मैले व्यक्तिगत रूपमा निकै सकारात्मक लिएको छु । यसले नेपाली फुटबलमा केही गर्न सकिन्छ भन्ने देखाएको छ । यस्तो सम्झौताले अन्य नयाँ अवसर तयार पार्न मदत मिल्ने विश्वास छ । यसले सुदूरपश्चिमको पयर्टनसँगै अन्य पक्षको विकास सम्भावना पनि बढाउने छ ।’
कार्यकारी निर्देशक सिरोहियाले भनेका छन्, ‘काठमाडौं स्पोर्ट्स डेभलपमेन्ट भेन्चर्सबाट हामीले क्रिकेटमा ठूलो लगानी गर्दै आएका छौं । यसलाई अन्य खेलकुदमा पनि लैजाने उद्देश्यले हामी धनगढी एफसीबाट सुदूरपश्चिम स्पोर्ट्स भेन्चर्ससँग जोडिएका छौं । नेपाली खेलकुदको लोकप्रिय खेल फुटबलसँग आबद्ध हुनु हाम्रा लागि ठूलो अर्थ छ । नेपाली फुटबल अझ लोकप्रियता बनाउने उद्देश्यले हामी आएका हौं ।’
.png)
