प्रहरीले आफूहरुले प्रकाशित गरेको समाचारको स्रोत के हो भन्ने प्रश्न गर्दै किन नकरात्मकता फैलाएको भन्दै सोधेको नेपाल प्रेस डटकमका प्रधान सम्पादक मात्रिका पौडेलको भनाइ छ ।
काठमाडौँ — प्रहरीको साइबर ब्युरोबाट पत्रकार विश्वमणि सुवेदी छुटेका छन् । नेपाल प्रेस डटकमका प्रधान सम्पादक मात्रिका पौडेलको जिम्मामा उनलाई छाडिएको हो ।
पौडेलले कान्तिपुरसँग कुरा गर्दै आफूहरुसँगै निस्किएको पुष्टि गरे । ‘म र अध्यक्ष विन्दु लम्साललाई पनि साइबर ब्युरोमा बोलाइएको थियो । हामीले समाचारको आधार, तथ्य, प्रमाण पेस गर्नुपर्यो भने तोकिएको अदालत र प्रेस काउन्सिलले मागे प्रमाणित गर्छौं । अरुलाई त्यसबारे सोध्ने अधिकार छैन भन्यौं,’ उनले भने ।
प्रहरीले चाहिँ समाचारको स्रोत के हो भन्ने प्रश्न गर्दै किन नकरात्मकता फैलाएको भन्ने सोधेको उनको भनाइ छ । ‘प्रधानमन्त्रीको सचिवालयबाट राजीनामा मागेको छैनौं, कसरी समाचार आयो, नियन्त्रणमा लिएर सोधपुछ गर भनेपछि बोलाएको’ भनेर समेत प्रहरीले बताएको पौडेलले बताए ।
पत्रकार सुवेदीलाई शुक्रबार अपराह्न नियन्त्रणमा लिएर उपत्यका अपराध अनुसन्धान कार्यालय, टेकु पुर्याइएको थियो । त्यसपछि उनलाई साइबर ब्युरोमा ल्याइएको थियो ।
