उद्योगी–व्यवसायीको माग र समस्यालाई ध्यानमा राख्दै उद्योग, वाणिज्य तथा आपूर्ति मन्त्रालयले कम्पनीको विवरण पेस गर्ने म्याद असोज मसान्तबाट पुस मसान्तसम्म थप गरेको हो ।
काठमाडौँ — सरकारले समयमै विवरण पेस नगरेका कम्पनीलाई जरिवाना मिनाहासहित विवरण अद्यावधिक गर्ने समय थप गरेको छ । उद्योगी–व्यवसायीको माग र समस्यालाई ध्यानमा राख्दै उद्योग, वाणिज्य तथा आपूर्ति मन्त्रालयले कम्पनीको विवरण पेस गर्ने म्याद असोज मसान्तबाट पुस मसान्तसम्म थप गरेको हो ।
मन्त्रालयका अनुसार कम्पनी ऐन, २०६३ बमोजिम दर्ता भएका तर कानुनअनुसार समयमै विवरण पेस नगरेका कम्पनीलाई लक्षित गरी कर, शुल्क, दस्तुर, ब्याज तथा जरिवाना मिनाहासम्बन्धी व्यवस्था गरिएको हो । यसअघि कम्पनीको विवरण अद्यावधिक गर्न असोज मसान्तसम्म समय दिइएको थियो । व्यवसायीको अनुरोधपछि उक्त समयसीमा तीन महिना थप गरी २०८३ पुस मसान्तसम्म पुर्याइएको हो ।
मन्त्रालयले सार्वजनिक गरेको सूचनाअनुसार आर्थिक वर्ष २०८२/८३ का लागि कानुनबमोजिम बुझाउनुपर्ने विवरण तथा लाग्ने कर, शुल्क र दस्तुर पुस मसान्तभित्र बुझाउनुपर्नेछ । तोकिएको अवधिभित्र आवश्यक विवरण पेस गरी प्रक्रिया पूरा गर्ने कम्पनीलाई यसअघिका कर, शुल्क, दस्तुर, ब्याज तथा जरिवाना मिनाहा हुने व्यवस्था गरिएको मन्त्रालयले जनाएको छ ।
विभिन्न कारणले लामो समयदेखि कम्पनीको विवरण अद्यावधिक गर्न नसकेका तथा कानुनी प्रक्रिया पूरा गर्न बाँकी रहेका व्यवसायीले यस व्यवस्थाबाट लाभ लिन सक्नेछन् । मन्त्रालयका अनुसार यसले समयमै विवरण पेस गर्न नसकेका कम्पनीलाई कानुनी दायरामा ल्याउन र अभिलेख अद्यावधिक गर्न सहयोग पुग्ने अपेक्षा गरिएको छ ।
मन्त्रालयले तोकिएको समयसीमाभित्र आवश्यक विवरण पेस गरी उपलब्ध सुविधाको उपयोग गर्न सम्बन्धित कम्पनी तथा व्यवसायीलाई आग्रह गरेको छ ।
प्रकृति कान्तिपुर मिडिया ग्रुपका आबद्ध दाहाल, अर्थतन्त्रका विविध आयाम, महिला अधिकार र प्रशासनका विषयमा रिपोर्टिङ गर्छिन् ।
.png)
