जलस्रोत तथा सिंचाइ विभागका महानिर्देशक दिनेश रजौरिया र सुनकोशी मरिन डाइभर्सन बहुउद्देश्यीय आयोजनाका निर्देशक कृष्णप्रसाद रिजाललाई प्रहरीले बिहीबार बेलुका नियन्त्रणमा लिएको हो ।
काठमाडौं — आयोजना अनुगमनका लागि भन्दै काठमाडौंबाट निस्किएका जलस्रोत तथा सिंचाइ विभागका महानिर्देशक दिनेश रजौरियालाई प्रहरीले बिहीबार बेलुकी सिराहाबाट नियन्त्रणमा लियो । उनीसँगै सुनकोशी मरिन डाइभर्सन बहुउद्देश्यीय आयोजनाका निर्देशक कृष्णप्रसाद रिजाल पनि प्रहरी नियन्त्रणमा परे । दुवैलाई त्यही राति काठमाडौं पठाइयो । तर काठमाडौं ल्याइएपछि उनीहरूलाई कहाँ राखिएको छ भन्ने खुलेको छैन ।
जिल्ला प्रहरी परिसर, काठमाडौंबाट आएको आग्रहका आधारमा उनीहरूलाई काठमाडौं पठाइएको प्रहरी उच्च स्रोतले पुष्टि गरेको छ । तर काठमाडौं प्रहरी परिसरका एसएसपी दिलीप घिमिरेले भने उनीहरूलाई आफ्नो कार्यालयमा नल्याइएको दाबी गरे । कान्तिपुरसँग उनले भने, ‘धेरैले मलाई सम्पर्क गरेर सोधिरहनुभएको छ तर उहाँहरूलाई यहाँ ल्याएका छैनौं ।’
उपत्यका अपराध अनुसन्धान कार्यालयका प्रमुख एसएसपी सन्तोष खड्काले पनि उनीहरूलाई आफ्नो कार्यालयले नल्याएको बताए । यसरी काठमाडौंका दुवै प्रहरी कार्यालयले उनीहरूलाई आफूहरूले नियन्त्रणमा नलिएको बताएपछि उनीहरू कहाँ छन् भन्ने प्रश्न उठेको छ ।
कान्तिपुरसँग कुरा गरेका अर्का एक प्रहरी अधिकृतले भने उनीहरूलाई काठमाडौं ल्याएर सिधै प्रधानमन्त्री तथा मन्त्रिपरिषद्को कार्यालय सिंहदरबारमा पुर्याइएको दाबी गरे । ‘केही विषयमा बुझ्नुपर्ने भन्दै उहाँहरूलाई त्यहीँ राखेर सोधपुछ भइरहेको छ,’ ती अधिकारीले भने ।
प्रधानमन्त्री तथा मन्त्रिपरिषद् कार्यालयकी मिडिया व्यवस्थापन संयोजक दीपा दाहालले भने यस विषयमा आफूहरूलाई आधिकारिक सूचना नभएको बताइन् ।
सिंचाइ विभागका अधिकारीहरूले केही बुझ्नुपर्ने भए बोलाउँदा उपस्थित हुनेमा प्रहरी नै प्रयोग गर्नुको कारण आफूहरूले बुझ्न नसकेको बताएका छन् । ‘कुनै मुद्दा मामिला थियो भने अनुसन्धान गर्ने निकायमा लैजानुपर्ने थियो होला तर त्यसो भएको पनि बुझिएन,’ विभागका एक अधिकारीले भने ।
सुनकोशी मरिन डाइभर्सन आयोजनाको बाँध निर्माणतर्फको ठेक्काको आर्थिक प्रस्ताव खोल्ने तयारी भइरहेका बेला उनीहरूलाई नियन्त्रणमा लिइएको हो । आयोजनाको निर्माणमा अनियमितता भएको आरोप प्रधानमन्त्री तथा मन्त्रिपरिषद् कार्यालयका अधिकारीहरूले लगाएको दाबी ती अधिकारीहरूको छ ।
गौरव कान्तिपुर मिडिया ग्रुपका सुरक्षा संवाददाता हुन् । उनी राष्ट्रिय सुरक्षा मामिला, सुशासन र समसामयिक विषयमा रिपोर्टिङ गर्छन् ।
