कर्णाली प्रदेशकी भौतिक पूर्वाधार तथा सहरी विकासमन्त्री मिलन खड्का रोकाले आयोजनाको समस्या समाधान गरी निर्माण कार्यलाई तीव्रता दिन निर्माण व्यवसायी र मातहतका कार्यालय प्रमुखलाई निर्देशन दिएकी छन् ।
वीरेन्द्रनगर — कर्णाली प्रदेशकी भौतिक पूर्वाधार तथा सहरी विकासमन्त्री मिलन खड्का रोकाले रुग्ण आयोजनाको सम्पन्न गर्न निर्देशन दिएकी छन् । आयोजनाको समस्या समाधान गरी निर्माण कार्यलाई तीव्रता दिन निर्माण व्यवसायी र मातहतका कार्यालय प्रमुखलाई निर्देशन दिइन् ।
मन्त्रालयमा शुक्रबार आयोजित रुग्ण आयोजना समीक्षा, समस्या समाधान तथा आयोजना सम्पन्नतासम्बन्धी छलफलमा मन्त्री रोकाले विकास निर्माणका काममा देखिएका समस्या पहिचान गरी समाधानका उपाय खोज्नुपर्ने बताइन् । निर्माण व्यवसायीका वास्तविक समस्या समाधान गर्न मन्त्रालय तयार रहेको उल्लेख गर्दै काम सम्पन्न गर्न देखिएका अवरोधबारे सम्बन्धित जिल्ला कार्यालय र मन्त्रालयमा आएर स्पष्ट छलफल गर्नुपर्ने उनको भनाइ थियो ।
समस्यालाई थप जटिल बनाउनुको सट्टा त्यसको गाँठो फुकाएर विकास निर्माणका कामलाई अगाडि बढाउनुपर्ने उनको भनाइ छ । मन्त्री रोकाले निर्माण व्यवसायीले काम गर्ने प्रतिबद्धता जनाउने तर कार्यप्रगति नदेखाउने प्रवृत्ति स्वीकार्य नहुने स्पष्ट पारिन् । आवश्यक सहजीकरण गर्दा पनि जिम्मेवारी पूरा नगर्ने र काम अगाडि नबढाउने प्रवृत्तिलाई निरन्तर छुट दिन नसकिने बताइन् ।
रोकिएका आयोजना, बहुवर्षीय आयोजना तथा विभिन्न कारणले ढिलाइ भएका निर्माण कार्यको अवस्था समीक्षा गर्दै समस्या समाधानका लागि आवश्यक पहल गर्ने विषयमा छलफल भएको थियो ।
प्रदेश सचिव अर्जनकुमार बमले पटकपटक म्याद थप गर्दापनि प्रगति नदेखिएका योजनालाई कानुनबमोजिम अगाडि बढ्ने स्पष्ट पारे । जिम्मेवारी पुरा नगर्ने कार्यालय प्रमुखलाई पनि मन्त्रालयले गम्भीर रुपमा लिएको उनको भनाइ थियो ।
हाल कर्णालीका ८ वटा जिल्लामा १९ वटा रुग्ण आयोजना छन् । केहीको प्रगति शून्य छ भने केहीको प्रगति थोरै मात्रामा भएको मन्त्रालयले जनाएको छ । कार्यक्रममा निर्माण व्यवसायी तथा मन्त्रालय मातहतका कार्यालय प्रमुखहरूको सहभागिता रहेको थियो ।
तृप्ति शाही कान्तिपुरकी सुर्खेत संवाददाता हुन् ।
