राष्ट्रिय प्रजातन्त्र पार्टीका नेता कमल थापाले पार्टी नेतृत्वकै कारणले सङ्गठनात्मक रूपमा पार्टी अत्यन्तै कमजोर अवस्थामा पुगेको आरोप लगाएका छन् । महोत्तरी जिल्लास्तरीय कार्यकर्ता भेला र अन्तरक्रिया कार्यक्रममा बोल्दै महाधिवेशन आउन एक महिना बाँकी छँदा पनि पार्टीप्रति कुनै उत्साह नभएको बताए।
राजा र हिन्दू राष्ट्रप्रति जनतामा विश्वास बढ्दै गएपछि पार्टीप्रति जनताको भरोसा टुट्दै गएको उनको भनाइ छ । हिन्दू राष्ट्र र राजसंस्थाको एजेन्डा बोकेर जनताको भोट मागेर चुनाव जितेपछि गणतन्त्रको मुख्य संवाहक प्रचण्डको नेतृत्वमा बनेको सरकारमा सहभागी भएर गल्ती गरेको भन्दै अध्यक्ष राजेन्द्र लिङदेनप्रति कटाक्ष गरे । कुनै एउटा व्यक्तिको मात्रै नभएर आफूहरू सबैबाट कमजोरी भएको पनि स्वीकारे । हिन्दू राष्ट्र र राजसंस्था पुनर्स्थापना नभएसम्म सत्ता केन्द्रित फोहोरी प्रतिस्पर्धामा नलाग्ने विश्वास जनतामा दिलाउन सक्नुपर्ने बताए। अहिलेको भ्रष्ट व्यवस्था र भ्रष्ट शासकबाट देशलाई मुक्त तुल्याउने सङ्कल्प राप्रपाले गरे जनताले विश्वास गर्ने बताए।
उनले भने, ‘चुनाव नजिक आइराखेको छ। चुनावमा उम्मेदवार हुने पार्टी कार्यकर्ताहरूमा उत्साह छैन। गएको डेढ–दुई वर्षदेखि हामी कार्यक्रम शून्य अवस्थामा छौँ। पार्टीको केन्द्रले कुनै कार्यक्रम दिएको छैन। वर्गीय सङ्गठनहरू निष्क्रिय अवस्थामा छन्। भातृ सङ्गठनहरू केन्द्रदेखि गाउँ तहसम्म निष्क्रिय अवस्थामा रहेका छन्। यसमा जिल्लामा, गाउँमा बस्नेहरूले कुनै अपराध गर्नुभएको छैन। दोष छैन। गल्ती कहीँ कतैबाट भएको छ भने केन्द्रीय नेतृत्वबाट भएको छ। हामीबाट पटक-पटक गल्ती भएको कारणले गर्दा जनताले पनि हामीलाई भरोसा गर्न छोडेको हो। हामी हिन्दू राष्ट्र र राजसंस्थाको कुरा गर्छौँ, चुनावमा जितेपछि गणतन्त्र ल्याउने मुख्य व्यक्ति प्रचण्डकै नेतृत्वमा सरकारमा जान्छौँ, अनि जनताले कसरी पत्याउँछ हामीलाई ? हामीमा इमानदारिता भएन। हामी सबैको साझा जिम्मेवारी छ। कहीँ न कतै हामीबाट कमजोरी भएको छ, मबाट पनि भएको छ। म पनि आफ्ना गल्तीहरूको आत्मालोचना गर्दछु। र अब एक पटक हामीले इमानदारीका साथ अघि बढ्ने सङ्कल्प गर्नुपर्दछ।’
