तिहार तथा छठ पर्वलाई लक्षित गर्दै भारतबाट विस्फोटक पदार्थ तथा पटका भित्रिन नदिन सीमामा कडाइ गर्न थालिएको प्रहरीले जनाएको छ ।
नजिकिँदै गरेको तिहार तथा छठ पर्वलाई लक्षित गरी भारतबाट अवैध रूपमा भित्र्याइएको लाखौं रुपैयाँको पटका सशस्त्र प्रहरीले बरामद गरेको छ।
नेपाल–भारत सीमा क्षेत्रको दशगजा नजिकै मलंगवा नगरपालिका–१, भेडियाहीस्थित देवनारायण यादव र योगेन्द्र यादवको घर तथा गोठबाट लाखौं रुपैयाँको पटका बरामद गरिएको हो। लुकाएर राखिएको अवस्थामा १५ लाख रुपैयाँ बराबरको पटका बरामद गरिएको सशस्त्र प्रहरी बल नं. १० गणका गणपति सशस्त्र प्रहरी उपरीक्षक अमरबहादुर खत्रीले जानकारी दिए।
अवैध सामान लुकाइछिपाइ राखिएको सूचना पाएपछि सीमा सुरक्षा गुल्म मलंगवा, नं. १० गण अगर्वा र बोर्डर आउट पोस्ट (बीओपी) खुटौनाबाट ६२ जनाको संयुक्त टोली खानतलासीका लागि घर तथा गोठमा पुगेको थियो। टोलीले १५ लाख रुपैयाँ बराबरको पटका र दुई लाख ३५ हजार रुपैयाँ बराबरको कपडासमेत बरामद गरेको सशस्त्र प्रहरी उपरीक्षक खत्रीले बताए।
बरामद गरिएका कपडा आज भन्सार कार्यालय मलंगवामा बुझाउने र पटका नष्ट गर्ने प्रक्रिया भइरहेको सशस्त्र प्रहरीले जनाएको छ। तिहार तथा छठ पर्वलाई लक्षित गर्दै भारतबाट विस्फोटक पदार्थ तथा पटका भित्रिन नदिन सीमामा कडाइ गर्न थालिएको प्रहरीले जनाएको छ।
