मुक्तिनाथ क्यापिटल लिमिटेडले विश्व लगानीकर्ता सप्ताह २०२६ को अवसरमा ताल्छेंनस्थित लिन्फोड कलेजमा वित्तीय साक्षरता कार्यक्रम सम्पन्न गरेको छ। असोज २३ गते आयोजित कार्यक्रममा स्नातक तहमा अध्ययनरत करिब १०० जना विद्यार्थी सहभागी भएका थिए।
विद्यार्थीलाई धितोपत्र तथा पुँजी बजारबारे आधारभूत ज्ञान प्रदान गर्ने र लगानीसम्बन्धी सचेतना अभिवृद्धि गर्ने उद्देश्यले कार्यक्रम आयोजना गरिएको कम्पनीले जनाएको छ। कार्यक्रममा सेयर बजारमा प्रवेश गर्नुअघि जान्नुपर्ने विषयदेखि लगानी गर्दा अपनाउनुपर्ने सावधानीसम्मका विषयमा जानकारी दिइएको थियो।
कार्यक्रममा डिम्याट सेवा प्रदायक तथा धितोपत्र व्यवसायसँग सम्बन्धित गतिविधि, सेयर लगानीका आधारभूत पक्ष, लगानीमा हुन सक्ने जोखिमको व्यवस्थापन र सुरक्षित लगानीका अभ्यासबारे छलफल गरिएको थियो। यस्ता कार्यक्रमले विद्यार्थीलाई वित्तीय निर्णय लिन आवश्यक ज्ञान प्रदान गर्नुका साथै पुँजी बजारमा जिम्मेवार सहभागिताका लागि प्रेरित गर्ने अपेक्षा गरिएको छ।
