शनिश्चरेमा प्रहरीमाथि गोली प्रहारको प्रयास भएपछि आत्मरक्षामा गोली चलाइएको र करिब ५०० ग्राम हेरोइन तथा पेस्तोल बरामद भएको छ।
मोरङ — मोरङको रतुवामाईमा लागुऔषध नियन्त्रणका लागि खटिएको प्रहरी टोली र कारोबारीबीच बिहीबार राति जम्काभेट हुँदा गोली चलेको छ । प्रहरीको गोली लागेर दुई भारतीय नागरिक घाइते भएका छन् भने एक नेपालीसहित तीन जना पक्राउ परेका छन् ।
रतुवामाई नगरपालिका–६ शनिश्चरेमा राति करिब ९ : ३० बजे भएको घटनामा प्रहरीले आठ राउन्ड गोली चलाएको हो । पक्राउ परेकाहरूको साथबाट करिब ५०० ग्राम खैरो हेरोइन, एक थान पेस्तोल र गोली बरामद भएको मोरङ प्रहरीका सूचना अधिकारी डीएसपी मकेन्द्रकुमार मिश्रले जानकारी दिए ।
मिश्रका अनुसार लागुऔषध कारोबार भइरहेको सूचनापछि लागुऔषध नियन्त्रण ब्युरो कोटेश्वर, काठमाडौंका इन्स्पेक्टर राकेश यादवको नेतृत्वमा र लागुऔषध नियन्त्रण ब्युरो विराटनगरबाट खटिएको संयुक्त टोलीले शनिश्चरेमा निगरानी तथा चेकजाँच गरिरहेको थियो । सोही क्रममा भारतीय नम्बर प्लेटको मोटरसाइकलसहित दुईवटा मोटरसाइकलमा आएका तीन जनालाई प्रहरीले रोक्न खोजेको थियो ।
प्रहरीलाई देखेपछि उनीहरू भाग्न खोजेका थिए । नियन्त्रणमा लिन खोज्दा प्रहरीमाथि नै गोली प्रहारको प्रयास भएपछि आत्मरक्षाका लागि गोली चलाउनुपरेको डीएसपी मिश्रले बताए । उनका अनुसार प्रहरीले चाइनिज पेस्तोलबाट पाँच र ब्रेडा पेस्तोलबाट तीन राउन्ड गोली चलाएको हो ।
गोली लागेर भारतको अररिया कुशाहाका २२ वर्षीय दीपककुमार बोसाक र कुटुमगन्जका ४० वर्षीय पुरन बोसाक घाइते भएका छन् । दुवैको घुँडामुनि गोली लागेको र अवस्था मध्यम रहेको प्रहरीले जनाएको छ । उनीहरूलाई सुरुमा झुर्कियास्थित नगर अस्पतालमा प्राथमिक उपचार गराएर थप उपचारका लागि विराटनगरस्थित कोशी अस्पताल ल्याइएको छ ।
पक्राउ पर्नेमा घाइते दुवै भारतीयसँगै रतुवामाई नगरपालिका–१ चुनिमारीका ३५ वर्षीय प्रमोद ठाकुर छन् । उनीहरू सवार दुवै मोटरसाइकल पनि प्रहरीले नियन्त्रणमा लिएको छ ।
प्रहरीका अनुसार बरामद पेस्तोल होममेड हो । त्यसमा प्रयोग हुने एक राउन्ड गोलीसमेत फेला परेको छ । बरामद खैरो हेरोइनको परिमाण करिब ५०० ग्राम रहेको प्रहरीले जनाएको छ ।
पक्राउ परेकाहरू लागुऔषध कारोबारमा संलग्न नामुद कारोबारी रहेको प्रहरीको दाबी छ । उनीहरूले लागुऔषध कहाँबाट ल्याउने गरेका थिए, कसलाई बिक्री गर्थे र यसमा अरू कोको संलग्न छन् भन्ने विषयमा प्रहरीले अनुसन्धान अघि बढाएको छ ।
घटनाको थप अनुसन्धान इलाका प्रहरी कार्यालय सिजुवाका इन्स्पेक्टर कैलाश लिम्बू नेतृत्वको टोलीले गरिरहेको छ । घटनास्थल सिजुवा प्रहरी कार्यालयबाट करिब ६ किलोमिटर पश्चिम–दक्षिणमा पर्छ ।
सुशीला पाठक कान्तिपुर टेलिभिजनमा कार्यरत छिन्
